Ndaw ndoengfaex miz aen ranz iq gyaeundei ndeu. Ranz iq dingjranz soem- set、conghcueng ronghcingx, najranz dwg aenhongh hai rim va gyaeundei he. Aen ranz neix dwg aen ranz lwgdouq.

Lwgdouq ceiq maij youq ngoenz doek fwn、doek nae okdou yawj baengzyoux, aenvih de rox mwhde gyoengq baengzyoux ndaejhoengq, maij ra vunz gangjgoj.

Ngoenz fwn doek seizcin, lwgdouq maij gang aen liengj heu ndeu. Baengzyoux de duzcenh gyaegyae yawjraen le, ndawsim siengj: Aen liengj lwgdouq geijlai lumj mbawgyoij hung ndeu ha! Aen liengj youq ndaw fwn heusausau, lumj mbawgyoij cingq riengz rumz bidoengh ne!

Ngoenz fwn doek seizhah, lwgdouq maij gang aen liengj saekmaeq ndeu. Baengzyoux de maxloeg iq gyaegyae yawjraen le, ndawsim siengj: Aen liengj lwgdouq geijlai lumj duj vameizgveiq ndeu ha! Fwn doek youq gwnzde, yienh ndaej engqgya gyaeundei lo, lumjbaenz miz baenz raq baenz raq heiq va hom ci gvaqdaeuj ne!

Ngoenz fwn doek seizcou, lwgdouq gyaez gang aen liengj henj ndeu. Baengzyoux de lwgmui gyaegyae yawjraen le, ndawsim siengj: Aen liengj lwgdouq geijlai lumj aen makgaivaiz ndeigwn he ha! Gou lumjbaenz nyouq daengz feihmak vansubsub ne!

Seizdoeng daengz lo, gwnzmbwn mongmwtmwt doek roengz naehau, seiqhenz benq hausagsag ndeu, mwhde lwgdouq gyaez gang aen liengj nding ndeu. Baengz- youx de noucoengz gyaegyae yawjraen le, ndawsim siengj: Aen liengj lwgdouq geijlai lumj aen daengngoenz ndingyanyan he ha! Noucoengz mbouj nit lo, roxnyinh swhgeij lumj ndaej byoq feiq nei, ndawsim raeujrubrub.

Gyoengq baengzyoux cungj naeuz: “Lwgdouq, aen liengj mwngz hawj aen- ndoeng engqgya gyaeundei lo!”

(Gyangjsuh Swngj Nanzdungh Swh- fan Daihngeih Fusiuj ngeih nienzgaep Cai Couhdungz)