Cuengqhag naengh laedienh dauqranz, gou aemq daehsaw ing youq bangxlaeng laedienh. Doxboh raen le, yiemzsuk caeuq gou naeuz:“Seizbienh dieg lawz cungj ing dwg gij gvenq mbouj ndei. Mizmbangj aen laedienh bangxlaeng de dwg dou, hai ndaej, ing haeuj de bae ne yungyiemj raixcaix. Ndaw ndwenngoenz lij miz haujlai doxgaiq mbouj lumj yawj hwnjbae baenzhaenx maenh, seizbienh ing hwnjbae yungyiemj raixcaix.”

Gaenlaeng daxboh youh gangj aen goj caen ndeu hawj gou： Miz boux lwgnyez ndeu ing youq gaiq lanz bakcanz, doeklaeng gaiq lanz soeng le, lwgnyez daj gwnz laeuz doek roengz baihlaj bae, mbouj miz mingh lo.

Dingq le daxboh gangj, gou lau raixcaix, caiq hix mbouj gamj luenh ing lo. Dauqngeix gaxgonq, gou ciengzseiz naengh mbouj baenz naengh, ndwn mbouj baenz ndwn, mbouj dwg ing aen’eij、 aencongz, couhdwg ing bangxciengz, lienz byaij roen hix gyaez ing haeuj bouxwnq bae, caezgya cungj naeuz gou lumj “diuz gaeu ndeu”.

Ndaw govwnz raeuz hag miz coenz vah baenzneix：“Ndwn lumj coengz, naengh lumj cung, byaij lumj rumz, ninz lumj gung.” Gou baezlaeng itdingh aeu haeujrwz gij yiengh bonjfaenh, guh boux vunz cingsaenz gvaekgvaek ndeu.

(Ngeih nienzgaep Bungz Yizcangh)