Ndaw sujgyaj, gou bae ranz yah- daiq. Ranz daiq miz aen suenbyaek ndeu, gizde hix dwg aen suen’angq gou.

Suenbyaek ranz daiq dwg gizdieg hoenghfwdfwd ndeu. Henz led baih- doeng ndwn baenz baiz baenz baiz haeuxyangz, lumj baenz lied baenz lied bouxbing. Henz aen suenbyaek, baenz aen baenz aen lwgmanh dingjmbwn nding’yanyan ndaengndiengq daengj soh aenndang de, lumj dwg naeuz: “Hw! Gou dwg bouxvuengz lwgmanh bw, mbouj saenq mwngz cimzcimz yawj!” Goraz sohswdswd saenzheiq dwk ndwn youq henz led baihsae, gyoengqde yienznaeuz byom iq, hoeng cix cingsaenz gvaekgvaek. Lwgfaeg caeuq lwggva aende gig hung, mbei cix gig iq, gyoengqde ndoj youq laj mbaw hung, haha, dwg lau lij caengz baenzgeq couh deng gwn luba? Baenz go baenz go lwggve banqraih youq gwnz led baihnamz, ngoenznaengz goengda cungj mbaet geij aen lwggve heuh yahdaiq cauj hawj gou gwn, lwggve haeuj bak raeuzrwdrwd, homfwdfwd, ndei gwn raixcaix. Henz gaeu lwggve dwg benq goduh ndeu, lwg faekduh ndoj youq ndaw gyoivenj meh faekduh caenfwngz guh haenx, cingq ninzfofo ne! Coenggep heusausau、makyungz nding’yanyan、lwgbiengz heuoiq、lwg- gwz gyaemqgwt ciuq gonqlaeng baiz- doih, maj ndaej hoenghhwdhwd. Baih- baek suenbyaek dwg aen daemz ndeu, aenngaeux hauoiq cingq youq laj naezngawh haenqrengz majhung ne!

Doenghduz iq hix gyaez aen suenbyaek neix bw! Gyanghaet, sae- haexma youq gwnz mbawbyaek dumz- dwddwd raih bae raih dauq, dwg mbouj dwg cingq lienhndang ne? Daengz banhaemh, daekdaeq caeuq duzgoep couh ciengq hwnj go angqyangz.

Ma daengz ndaw singz, gou engq siengjniemh aen suenbyaek yahdaiq lo. Binaj sujgyaj, gou lij yaek bae yawj gyoengq baengzyoux ndaw suenbyaek.

(Cezgyangh Swngj Dungzyangh Si Cunhhuih Siujyoz sam nienzgaep Ya Lozsih)