Gaxgonq, miz doiq songseng ndeu, gyoengqde beizheiq ndei、gvaigvetgvet、ndangcangq. Hoeng, ranz gyoengqde hoj lai, ciengzseiz donq iek donq imq. Daeggo mbouj gyaez aen ranz hoj, cix muengh ndwen- ngoenz boux miz ngaenz. Daegnuengx yienznaeuz hix muengh ndwenngoenz boux miz ngaenz, hoeng de mbouj dwgcaengz aen ranz hoj, cix dwg naemj yungh hag bae gaijbienq minghyinh.

Daeggo dauqdaej nyaenx mbouj ndaej cungj ndwenngoenz neix, gaen baengzyoux de bae baihrog, vih ra ndaej ngaenz lai, byaij hwnj diuzroen famhcoih lo. Daeggo ra ndaej ngaenz lailai, hix fak di ngaenz dauq ranz hawj daxboh daxmeh, ok ngaenz hawj daegnuengx doegsaw. Daxboh daxmeh laihnaeuz daeggo youq baihrog ra ndaej faenh hong ndaej ngaenz lai ndeu, couh ansim gvaq ndwenngoenz lo.

Miz baez ndeu, mwh daeggo guhcaeg, miz vunz bauqgingj le, gingjcaz gig vaiq gaemh ndaej daeggo. Daeggo haeuj lauz naengh lo, couhcinj de ienqhoij gij saeh bonj- faenh guh raixcaix, cix mbouj gaijbienq ndaej gijmaz, aenvih de deng buenq dai. Aen simmuengh ceiq laeng de dwg dauqranz, yawjyawj bohmeh. Daegnuengx rox le daeuj yawj daeggo, daeggo doiq daeg- nuengx naeuz：“Nuengx ha, mwngz bang gou naengh lauz geij ngoenz, gou dauqbae yawjyawj bohmeh, 3 ngoenz le gou itdingh dauq- daeuj.”

Daegnuengx ngaek gyaeuj ei lo, de doq ra gouz bouxdawzlauz, hawj bonjfaenh lawh daeggo naengh lauz. Seizhaenx faplwd hawj bouxwnq lawh bouxfamh naengh lauz ndaej, hoeng danghnaeuz hengzhingz ngoenz haenx bouxfamh mbouj daeuj, boux lawh naengh couh aeu lawh bouxfamh souhdai.

Bouxdawzlauz ei hawj gyoengqde doxlawh.

3 ngoenz seizgan couh lumj duzloeg buetfofo nei. Goj buet goj buet couh mbouj raen ngaeuz lo. Hengz- hingz ngoenzhaenx fwn hung rumz hung, fagfouj seizseiz yaek doek roengz gyaeujhoz daegnuengx bae, sojmiz vunz youq ciengz cungj vih daegnuengx heuh mbouj goengbingz. Daegnuengx cix naeuz：“Gou nyienh vih daeggo bae dai!” Seizneix, daeggo rongx gyoengqde buet gvaqdaeuj, mbeilaux byaij coh daizraemjgyaeuj, vuenh daegnuengx roengzdaeuj.

(Gveigangj Si Gangjbwz Gih Ginhhang Siujyoz roek nienzgaep Cuh Yungjcangh)