Aenvih gou dam loengh soujgih, cadi haih gou bingz mbouj hwnj hagseng ndei. Baez neix “gwn haemz” hawj gou ciuhvunz nanz- lumz.

Gou daj hwnj sam nienzgaep, couh yinx loengh soujgih lo, daengxngoenz mbouj liz soujgih, mwh hwnjdangz hix laeglemx loengh. Hoeng hwnj daengz seiq nienzgaep, daxboh daxmeh hainduj son guenj gou yiemzrwdrwd, lauxsae hix daengxngoenz yawj gou, neix hawj gou cingzcik doek haujlai, dajneix mbouj caiq doxhwnj gvaq, lauxsae doiq gou saetmuengh、lij miz bohmeh saetmuengh、hozhwnj, gou cungj mbouj roxnyinh daengz. Baez ndeu, vanzlij deng bohmeh dop naj geij mbat, gou hozhwnj raixcaix, roxnyinh bonjfaenh loengh di youzheiq mbouj miz maz, lij ndaej dem dungxcaiz ne, mbouj guh saehloek. Gig vaiq, daengz baez ceiq laeng ciuqei gaujsi, cingzcik gou doek daengz byailaeng, daxmeh daxboh mboujdan siengsim youh hozhwnj raixcaix, hoeng gou lij caengz roxnyinh guh loek gijmaz, lijdwg daengxngoenz yinx loengh soujgih, daxboh daxmeh baez hozhwnj, fad aen soujgih gou dekdad bae, gou sim lumj cax heh nei, baez daih’it rongx coh bohmeh, buet okdou daeuj.

Gig vaiq, haggeiz gaujsi doekbyai bi gauj baez yaek daengz, aenvih yinx loengh soujgih, sojmiz sawsa gou hag haenx ca mbouj lai lumz liux lo, gou cengdi vutvet lo. Hoeng gou youh mbouj naemj hawj bonjfaenh bienqbaenz boux vunz mbouj miz yungh ndeu, yienghneix aen singgeiz gaxgonq gaujsi, gou un saw haenqrwdrwd, seizseiz cungj hag. Cingzcik okdaeuj, gou gauj ndaej haeuj nienzgaep baihnaj 50 mingz, mwhhaenx gou angqyangz dwk diuq yut diuq yet, lauxsae、bohmeh cungj roxnyinh neix dwg gienh saeh naemj mbouj doeng ndeu.

Ndaej baez hit neix, gou yienznaeuz yinx loengh soujgih mbouj rox mbwq, caeklaiq gou gipseiz singjsag gvaqdaeuj mbouj caiq loengh. Seizneix gou caiq hix mbouj yinx loengh soujgih, cix anbaiz ndei seizgan, aeu hag youqgaenj.

(Seiq nienzgaep Cwngz Yigyauh)