Gaeqbouxlwg youq mwh iq couh raen duzyiuh youq gwnz mbwn mbin, gaeqbouxlwg hozhaenz bae liux, caemh siengj mbin, couh ngoenzngoenz lienh mbin.

Haujlai bi gvaqbae le, gaeqlwg maj hung lo, baenz duz gaeqbouxlaux ak he. De daeuj daengz dingjbya, guh gij yiengh yaek mbin. Duz yiuh ndeu mbin gvaqdaeuj cam naeuz:“Daegnuengx ha, mwngz yaek guh maz?” Gaeqboux naeuz:“Gou aeu caeuq gyoengqsou ndijgaen youq gwnz mbwn mbin!”Duzyiuh riu de:“Nuengx baenzlai biz, lij siengj youq gwnz mbwn mbin, vanzdwg dauq bae ranz mwngz gwn haeuxnyawh ba!”

Gaeqboux simnaiq liux, de baenzlawz cungj mbouj saenq vah duzyiuh. Gaeqboux youh caiq guh gij yiengh yaek mbin, liux le couh cungfozfoz buet daengz henz dat, diuq roengzbae lo. Vunzranz gaeqboux youq ranz deq le geij ngoenz, cungj deq mbouj daengz gaeqboux dauqma. Yienghneix vunzranz couh dauqcawq bae ra gaeqboux, gvaq geij ngoenz youq ndaw ndoengfaex laj bya raraen gaeqboux, ga de gaenq raek.

Sieng ndei le, gaeqboux youh siengj bae dingjbya lienh mbin. De naeuz hawj vunzranz rox, vunzranz gangj maz cungj mbouj hawj, mbouj siengj hawj gaeqboux caiq bae guh saeh yungyiemj. Hoeng gaeqboux lij dwg gietdingh bae sawq mbat ndeu, vihliux mbouj hawj gaeqboux oksaeh, vunzranz caemh gaen bae lo. Daengz dingjbya, gaeqboux youh caiq guh gij yiengh yaek mbin, mbat ndeu couh diuq roengz dat bae.

Vunzranz gaeqboux vaiqdi daengz henz dat ngonz, mbouj raen gaeqboux, gyoengqde laihnaeuz gaeqboux youh doek roengz ndoengfaex bae lo, sawqmwh miz duz yiuh ndeu mbin gvaqdaeuj naeuz:“Gyoengq vunzranz gaeqboux, ngonz doxhwnj vei!” Gyoengq vunzranz gaeqboux ngonz doxhwnj, neix mbouj dwg gaeqboux ma? De rox mbin lo!

Doeklaeng, duz gaeqboux rox mbin haenx ndaej gyoengqvunz gyo youq ndei gwn van ngoenz ndei gvaq ngoenz, mbin bae giz gyae lo.

(Gveigangj Si Gangjbwz Gih Gveicwngz Gaihdau Cunghsinh Siujyoz sam nienzgaep Vangz Yihangz raiz Yangz Yenlinz hoiz)