Gvaq ngeihcib bi le, gou gaenq dwg boux gohyozgyah seiqgyaiq mizmingz ndeu lo. Swnh cuengqgyaj, gou boux hwnzngoenz siengjniemh ranzmbanj neix, hai gyaq ci daiyangznwngz gou fatmingz haenx mbin bae coh ranzmbanj.

Ci onjdangq hai baenaj, gova’gveiq song mbiengj goengloh gaenq maj sang’vid. Gova- gveiq lumj baenz aen baenz aen liengj hung gang ok, gij raemh de cw gvaq diuz goengloh. Duzroeg youq gwnz faex hemqcica, lumj dwg angqcoux gou ma ranzmbanj. Baenz doengh baenz doengh laeuz sang seiq caengz yiengh lumj aendapcihgim hoengzhoengz loegloeg haenx, cingjcingj caezcaez baiz youq song mbiengj goengloh, moix doengh laeuz dingjlaeuz cungj miz aen suenva ndeu. Neix dwg gou deng gij daegdiemj gezgou maenhdangq aendap- cihgim ciuhgeq Aihgiz daezsingj sezgi ok aenranzlaeuz moq. Ranzlaeuz dwg aeu caizliu gauhgohgi mbaeu vanzbauj guh baenz, dwg cungj ranzlaeuz rox diemheiq ndeu, dingj saenqdoengh gig ndei, ndaej guhdaengz 8 gaep deihsaenq saenq mbouj laemx, 9 gaep deihsaenq mbouj miz saeh.

Ci gou ngamq dingz ndei, daxmeh couh daj ndaw ranz okdaeuj coux gou. “Meh, iek yaek dai lo!” Gou riu naeuz. Vah gou ngamq gangj sat, “ranzdajcawj cinwngz” henz de couh gag haidoengh lo, yaep he daiz haeuxbyaek rangfwd he couh baij youz gwnz daiz. Cungj “ranzdajcawj cinwngz” neix dwg baengzyoux ndei gou Fucihbauh Gunghswh cungjcaiz Yangz Hauyuz fatmingz, cijaeu gihgi ciepsou daengz coenzvah daegbied haidaeuz anlaeb ndei haenx, lumj cih “iek” ha daengj, couh rox guh ok haeuxbyaek feihdauh daeuj. Haxbaenh mwh gou haeuj dou, “ranzdajcawj cinwngz” gaenq doiq gou guh cienzfueng’vih saujmyauz, rox gij sibgvenq gwn caeuq gwn lainoix gou, baujcingq guh’ok haeuxbyaek habbak youh mbouj saisaengq.

Gwn imq ndoet doh le, daxmeh daiq gou bae yawj aending、aenrug…… ranz moq, dou daeujdaengz ruglienhndang ndaw seiq laeuz, gizneix miz ngeihcib lai aen conghcueng yiengh lumj aenhauhdoengz, lumj godaengngoenz nei riengz aendaengngoenz baenq. Gij conghcueng neix hawj hoengheiq caeuq ndit daihliengh haeuj ndaw rug daeuj, lij daiq gij heiqhaeu heiqfeiq ok rog bae. Dingjlaeuz an benjdenciz daiyangznwngz caeuq aengih rengzrumz fat- dienh, gyagiengz le vunzlai doiq saekloeg nwngzyenz sawjyungh, ndaej mbaet conzdungj nwngzyenz, youh gemjnoix wyangjvadan baizcuengq.

Yawj aen ranzmbanj gyaeundei, gou daj ndawsim gamjsouh daengz—— vunzlai roxnyinh danqnoix、vanzbauj yied daeuj yied lai, raen vuenyungz hix itdingh yied daeuj yied lai.

(Huzbwz Swngj Cangzyangz Dujgyahcuz Swciyen Siyen Siujyoz haj nienzgaep Maj Veijsinh)