Gaxgonq, boux vunzguhnaz ndeu ciengx miz bat golinxvaiz cocatcat caeuq bat vameizgveiq gyaeulili, song bat neix ngaiz cuengq youq ndijgaen.

Vameizgveiq raen saetnaj lai, gag naemj:“Gou baenzneix gyaeu, baenzlawz ndaej caeuq golinxvaiz guh ranznden ne?”

Yienghneix, vameizgveiq ngoenz- ngoenz ndaq golinxvaiz.

Miz ngoenz ndeu, doek fwnraq, golinxvaiz yaek deng rwed dai lo, vameizgveiq cix youq ndaw fwn diuqfoux angqvauvau ne, doq diuq doq naeuz:“Golinxvaiz neix, di fwn neix mwngz couh dingj mbouj ndaej lo, yaez lai.”

Golinxvaiz daejnga’nga naeuz:“Dwg lo, dahcej vameizgveiq, gouz dahcej coih nuengx dangj mbat ndeu ba.”

“Byawz aeu coih mwngz ha?”Vameizgveiq ndaengndiengq ndindi.

Golinxvaiz naemj mbouj doeng cam naeuz:“Hozbit aeu cungj vah neix ma gangj ne? Vihmaz raeuz mbouj ndaej doxhuz caemhyouq ne?”

Vameizgveiq yiemz golinxvaiz lai:“Bouxlawz aeu caeuq mwngz doxhuz caemhyouq, caeuq mwngz guh ranznden hoj youq lai.”

“Hoeng, raeuz ciuh neix cungj dwg aeu daeuj hawj vunz yawj, caiq naeuz……”

“Haep bak mwngz gonq!” Vameiz- gveiq hozgaek liux, “Mwngz couh deq youq gonq, mbouj yungh geijlai ngoenz mwngz rox deng rwed dai bae!”

Gvaq geij ngoenz, golinxvaiz caengz dai. Daengngoenz ngoenz haenq gvaq ngoenz, ngoenz ndat gvaq ngoenz, vameiz- gveiq yaek deng dak roz liux.

Raen vameizgveiq yaek deng dak roz, golinxvaiz vaiqdi aeu raemx ndaw ndang de hawj vameizgveiq.

Vameizgveiq raen sim raeuj lai, couh cam:“Baez gonq gou cix mbouj coih mwngz, baez neix guh maz coih gou ne?”

“Raen bouxde miz gunnanz, dou cungj rox bae doxcoih, sim golinxvaiz couhdwg yienghneix” Golinxvaiz naeuz, “Moix boux vunz cungj miz giz ndei de caeuq giz mbouj ndei de, raeuz aeu gaij giz mbouj ndei bae, aeu yawjraen giz ndei bouxde.”

Vameizgveiq dingq le, cungj najmong liux, gag ngaem gyaeuj roengz.

（Gangjbwz Gih Gveicwngz Gaihdau Cunghsinh Siujyoz sam nienzgaep（1）ban Couh Meijdungz raiz Yangz Yenlinz hoiz）