Vahsug naeuz ndaej ndei “ronghndwen bet nyied cibngux ronghsagsag”, ronghndwen bet nyied cibngux rongh dangqmaz, luenz dangqmaz. Moix daengz aen ciet neix, daengx ranz gou couh doxcomz naengh, doq yawj ronghndwen, doq gwn bingjronghndwen. Vuenvuen heijheij lwnh coenz sei roxnaeuz vahduenz mizgven ronghndwen.

“Ha, baenzneix baenzgwn, gou ngah baenz myaiz yaek rih bae.” Daegnuengx da dinghdingh yawj haeuxbyaek caeuq bingjronghndwen baenz congz, faj fwngz ndeu gaenq depgyawj aen hab bingjronghndwen ndeu bae lo.

Gou riengjret baet deuz fwngz daegnuengx, naeuz：“Naemj gwn bingjronghndwen couh aeu boih seigeq, boih ndaej coenz sei mizgven ronghndwen ndeu, couh ndaej gwn aen bingjronghndwen ndeu.” Neix dwg caezgya naeuz gvaq, mbouj ndaej mbouj guh ha.

Daegnuengx gaeu rwz nyauj gemj naeuz：“Ndaej ndaej, gou boih, w……ronghndwen lumj bingjrongh- ndwen.”

Gou bulu riu hwnjdaeuj:“Loeng, neix mbouj dwg seigeq.”

Daxbuz riu naeuz：“Duzlingz lauz ronghndwen.”

Gou bibi gyaeuj naeuz：“Loeng. Neix dwg mingzcoh gojgaeq, mbouj dwg coenz seigeq.”

Daxmeh ngauzngauz gyaeuj naeuz：“Ronghndwen cibngux cib- roek luenz.”

“Loeng. Neix dwg mingzcoh go.”

Seizneix, raen daxboh angq- yangz naeuz：“Gwnz haij ronghndwen hwnj, lajmbwn caemh seizneix.” Sawqmwh, gou yawjraen daxboh gaem cek 《Saw Boih Seigeq》 ndeu. Gou naeuz：“Daxboh dajlaih. Neix mbouj suenq.”

Yaek daengz gou angj bonjsaeh lo：“Naj mbonq ronghndwen lwenq, ngeiz dwg mwi gwnz dieg.” “Lij iq mbouj rox ndwen, heuhguh buenz- nyawhhau.” “Ronghndwen seizlawz ok, ndoet laeuj cam aenmbwn.”

Ha——Caezgya dopfwngz haenh huhu.

Gou gwn aen bingjronghndwen ndeu le. Yawj yiengh gyoengqde myaiz yaek rih, couh fat hawj boux aen. Dauqdaej dwg guh gvaqyinx ma.

Daxbuz haenh gou dwg boux hagseng iq miz dungxcaiz.

Youq mwh caezgya riuhaha, ranz dou gvaq mbat bet nyied cibngux gyaeundei ndeu.

( Haj nienzgaep Cinz Lungz)