Cin raeuj va hai, doenghgo didnyez, aen geiqciet neix dwg mwh byaekcwx ceiq oiq. Ngoenz singhgiz, gou caeuq daxmeh dawz fagcanj caeuq aendaeh caepcawq youq ndaw suen vat byaekcwx.

Go byaekcwx dou vat heuhguh golinzgaeq, de maj ndaej ak raixcaix, dingzlai maj youq dieg ndit cuk, caemhcaiq ra raen go le, couh youq henzgyawj raen miz haujlai go. Golinzgaeq aen geiqciet neix ndoj youq ndaw nywjhawq, hoj ra raeuh, aeu gungz hwet roengz gyawj najdieg, sijsaeq yawj. Dangh- naeuz bungz go miz ngazgawq caemhcaiq dep youq najdieg, haenx couhdwg golinzgaeq lo! Ngamq hainduj, gou gip lai, ra raen golinzgaeq le, mbouj vat laeg di, mbouj siujsim couh vat gat daengx golinzgaeq lo. Gvaqlaeng, gou rox, aeu vat lai laeg di, baujlouz gaiq rag golinzgaeq caezcingj. Riengzlaeng, caiq yaeng’yaeng saeuj namh bae, gou siujsim lili mbaet nywjhawq roengzdaeuj, doeklaeng aeu golinzgaeq cuengq roengz daeh bae.

Mwh vat byaekcwx, gou gip ndaej aen dienhvah soujbiuj ndeu, cam vunz bae vunz, gou dauqdaej ra raen bouxcawj lo, aeu aen dienhvah soujbiuj hawj de dauq.

Ngoenzneix, dou sou ndaej lailai, vat ndaej baenz daeh golinzgaeq. Dingqnaeuz golinzgaeq yw binghnyouhdangz baenz, gou couh soengq daengx daeh golinzgaeq bae hawj daxdaiq lo, aenvih de baenz binghnyouhdangz. Daxdaiq angqyangz raixcaix, banhaemh, daxdaiq guh gyaeqgaeq cien golinzgaeq hawj dou gwn. Caen dahraix, gaiq bonjfaenh guhhong ra ndaej cij dwg gaiq ceiq homvan.

(Ngeih nienzgaep Cwz Gvanlinz)