Ngoenz singhgiz, daengx ranz dou bae henz singz guhcaemz. Gou lij dawz aen dizginz iq simgyaez bae, caepcawq yienj rag diuzgo gou ceiq sugfwngz hawj caezgya dingq. Henz singz hoengheiq singjsien, gingjsaek gyaeundei, gyoengq vunzhung doq gwn caz doq gangjgoj, gou cwxcaih ninz youq gwnz eij, ngiengx gyaeuj yawj gwnzmbwn.

Gwnzmbwn seizneix lumjbaenz doengh dahaij heunaunau, duj dem duj fwjhau ndoj youq ndawrungj gwnzmbwn daxmeh, yienghhaenx cwxcaih. Gou naemj：Duzcinglingz fwjhau haengjdingh lumj gou nei, hix gaen daxmeh okdaeuj guhcaemz ne! Seizneix, miz gienhsaeh saenzgeiz lo, duj fwjhau ceiq hung ndeu sawqmwh bienqbaenz le dahsau iq ndeu, gou sijsaeq yawj, gwnz fwngz de lij dawz aen dizginz iq ndeu ne! Raq rumz ci daeuj, baihnaj dahsau iq comz miz haujlai duj fwjhau, miz lumj aen yinhfuz seiq faen, miz lumj aen yinhfuz bet faen, miz lumj aen fuzhauh dingzsat, lij miz lumj aen bujhauh yaemsang. Gou rox lo, neix couhdwg aen ginzbuj dahsau iq！ Dahsau iq daenj buhlaex saekhau hainduj yienj rag, gou laepda hwnj, sijsaeq dingq, lumjnaeuz caen dingq ndaej nyi diuzgo rwenzhap ndeidingq……

“Yenzyiz、yenzyiz, vaiq gvaqdaeuj, mwngz mbouj dwg naemj rag ginz hawj dou dingq ma?” Daxmeh heuh gou, yaepyet hawj gou daj aen seiqgyaiq ngeixnaemj geizheih dauq daengz yienhsaed, haha, fwj gwnzmbwn caen dwg bouxsaelaux sezswd.

“Daxmeh, gou daeuj lo！” Seizneix dahsau iq rag dizginz iq couhdwg gou lo!

(Gyanghsuh Swngj Suhcouh Vaigozyij Hagdangz Gu Yenzyiz)