Ndaw sujgyaj ngoenz gyanghaet ndeu, gou raurumz gikgyanggyang daj gwnz mbonq benz hwnjdaeuj, saemxsax haeuj veiswngh- genh bae cat heuj swiq naj. Sawqmwh, soujgih daxmeh yiengj lo, “Vei? Cai lauxsae, mwngz ndei……” Sim gou fwt diuq daengz conghhoz lo, gij baiqninz sikhaek cingsingj caez. Lij baenzneix caeux, Cai lauxsae vihmaz dwk dienhvah hawj daxmeh ne? Gou itmienh doeng siengj sae siengj, itmiemh ngeng rwz caeg dingq daxmeh dwk dienhvah. “Cunzranz…… ndei ha ndei ha, raeuz yaep ndeu raen!”

Gijmaz, cunzranz…… Dai lo dai lo, sujgyaj gvaq bae dingz ndeu lo, cozyez sujgyaj gou lij caengz sij saek di ne! Gou bouj haengjdingh bouj mbouj gib lo, danghnaeuz lauxsae cam baenzlawz guh ne? Gou simgip raixcaix.

Mbouj geijlai nanz, Cai lauxsae couh daeujdaengz ranz gou lo. Gou sim baez ndum, ganjgip ndoj haeuj ndaw veiswnghgenh bae. “Yungz Gij, Cai lauxsae daeuj cunzranz lo, mwngz youq ndaw veiswnghgenh ngaiznged gijmaz ne?” Gou haebhaeb heuj, menh- nyednyed byaij okdaeuj, heuh sing “lauxsae ndei” ndeu, couh yaek haeuj ndaw rug bae yawjsaw. Cai lauxsae lumj yawj ndaej ok gou simhaw, riu naeuz: “Mbouj gvaqdaeuj naengh saek yaep ha?” Dingq daengz lauxsae baenzneix gangj, gou cijndei baenq ndang gvaqdaeuj, naengh youq gwnz sahfaz.

“Gaej Yousim, gou mbouj dwg daeuj genjcaz cozyez mwngz law.” Gou fwt ngiengx gyaeuj hwnj, angq dwk yawj coh lauxsae, cij raen lauxsae yaepyaep da riu coh gou. “Ndaw sujgyaj, mwngz cungj guh gijmaz lone?” “Hag youzraemx, caeuq daxboh daxmeh bae youz, lij miz……” Gou youh simhaw ngaem gyaeuj roengzdaeuj, mbouj gamj yawj Cai lauxsae lo.

“Lij geiq ndaej cozyez gou anbaiz youq ndaw sujgyaj yaek doeg ngeihcib bonj sawgovai haenx lwi?” Gou ngaekngaek gyaeuj. “Geiq ndaej, gou lij lied le dansaw ne!” Cai lauxsae itmienh yawj dansaw gou itmienh cam: “Gij saw neix cungj gig ndei, gig hab nienzgeij seizneix mwngz doeg, mwngz doeg le geijlai bonj lo?” “Caet bonj.” Gou miz di daekeiq naeuz. Baez cuengq sujgyaj, gou couh maez haeuj ndaw doeg sawgovai bae, yienznaeuz cozyez sujgyaj caengz sij, hoeng saw gou cix doeg le mbouj noix ne! “Caen ndei! Lai doeg sawgovai, doiq daezsang doegsaw lijgaij caeuq sij faenzcieng naengzlig mwngz gig miz bangcoh. Ndigah, baez cozyez sujgyaj neix gou anbaiz gig noix, moegdik couhdwg hawj sou ndaej doenq ok engq lai seizgan daeuj doeg sawgovai.” Daxmeh hix roxnyinh Cai lauxsae gangj ndaej gig deng, mbouj dingz ngaek gyaeuj.

Gaen dwk, Cai lauxsae dawz gij biujyienh ndei rwix ngoenznaengz gou cungj gangj hawj daxmeh nyi, yienzhaeuh doiq gou naeuz: “Mwngz dawz bonj saw bae yawj ba!” “Neix……” “Cuengqsim, gou mbouj youq baihlaeng gangj mwngz mbouj ndei lwi. Gij gezdenj mwngz gou gaenq gangj sat lo.” Yawj lauxsae riu ndaej gig soeng, gou hix cuengqsim lo, ndonj haeuj ndaw rug bae yawj saw lo.

Mbouj rox gvaq le geijlai nanz, “gunglung” sing byajraez he, sawj gou daj gojgaeq ndaw saw rag dauq ndaw yienhsaed, rogcueng fwn doeksasa. Gou ganjgip iet gyaeuj ok ndaw rug daeuj, a, Cai lauxsae cingq caeuq daxmeh doxbiek ne! “Cai lauxsae, gwn ngaiz caiq baema ba.” Daxmeh hah Cai lauxsae naeuz. “Mbouj lo, gou banringz lij yaek bae ranz song boux hagseng cunzranz ne.” De vad fwngz riu coh dou, hai dou byaij bae lo.

Yawj Cai lauxsae youq gyang fwn byaij bae gyae, gou ndawsim gig gamjdoengh. Couhcinj youq ngoenz cuengqgyaj, couhcinj youq ngoenz fwn doek neix, lauxsae ciuqyiengh gvaqniemh dou, gvensim dou, dou youh baenzlawz ndaej mbouj roengzrengz doegsaw ne?

(Gyanghsih Swngj Giujgyangh Si Luzsanh Gih Daih’it Siujyoz Yungz Gij)