Aen singz gou youq haenx, ndaej vunzlai haenh dwg“singz heu Cungguek”“dieg miz fwen lailai”, aeu ndaej“ciengj vunz youq Lenzhozgoz”, dwg dieg hai aen hoih Cungguek—Dunghmungz Bozlanjvei daengznauq, dieg haenx couhdwg mbanjranz gou——Namzningz aen soujfuj Mbanjcuengh. Gou daj iq couh youq aen hawsingz neix majhung, ndaej raen mbanjranz ngoenz ndei gvaq ngoenz.

Gaxgonq youq Namzningz, okdou aeu naengh danci、goenggyauci, seizneix gaenq miz haj diuz deihdiet, vunzlai okdou cungj ndaej naengh deihdiet, dikci、ci caezyungh gizgiz cungj miz, vunzlai cungj naeuz bienqvaq lai. Ginghci hwngfat le, vunzlai goj roxlaex lai lo. Gou gingciengz raen bouxhaici yaek gvaq roen vunz byaij seiz rox dingz roengzdaeuj, deq vunzlai gvaqbae gonq, bungzraen bouxlaux byaij mbouj bienh, bouxhaici simndei de rox deq bouxlaux ancienz gvaqbae le cij hai ci.

Sausenhduiyenz hagdangz dou gingciengz bae guh bouxgagnyienh：Bae yinzminz gunghyenz gip gyaeuj- ien、youq segih baetdeih caeuq sik cingh mbawgvangjgau gwnzciengz bae、caeuq vunzlai gangj baenzlawz faen nyapnyaj. Gyoengqvunz caez henhoh aen mbanjranz gyaeundei neix.

Namzningz, aen hawsingz gou, aen ranzmbanj gou, vanzging ngoenz ndei gvaq ngoenz, ginghci ngoenz ak gvaq ngoenz. Gou rox, mbanjranz bienq ndaej baenzneix ndei dwg aenvih raeuz miz guekcoj maenh’ak, miz Cungguek Gungcanjdangj hung- mbwk.

Raeuz dwg daengzcog guekcoj, raeuz guh boux sausenhduiyenz aeu lai roengzrengz doegsaw, dingjmaenh bae guh, lai lienh ndang, caez okrengz guh baenz aen loqsiengj Cungguek Cunghvaz Minzcuz fukhwng hung- mbwk.

（Nanzningz Si Anhningz Lu Siujyoz Siz Cing’yiz raiz Yangz Yenlinz hoiz）