Bouxboux cungj miz aen simmuengh de, miz vunz siengj guh gunghcwngzswh, vih gensez guekcoj ok di rengz; miz vunz siengj guh giyezgyah, vih hwngfat ginghci guekcoj ok faenh rengz; miz vunz siengj guh lauxsae, vih guekcoj gungganq daih vunz moq. Hoeng aen simmuengh gou dwg guh boux canghyw.

Gou miz gvaq simmuengh lailai, siengj guh canghyw dwg aenvih binghraq binghbwt sinhgvanh. Mwh ngamq miz cungj binghraq neix, sinhvwnz ciengzseiz bauq naeuz mbangj vunz baenz cungj bingh dwglau neix dai bae lo. Sim gou hoj youq lai, cix bang mbouj ndaej saek yiengh. Doeklaeng, yihyoz gohyenz yinzyenz rox ndaej aen“baexmaed” binghdoeg, guh ok aen fueng’anq yw bingh, lij cauh ok yizmyauz dem. Mwh neix, gou roxnyinh canghyw dwg hangz hong hungmbwk、miznaj youh dwgrengz ndeu. Canghyw ndaej hawj bouxbingh ndang dauq cangq, ndaej hawj boux baenzbingh naek youh diuqdedded, yienghneix aen simmuengh gou couhdwg guh canghyw lo.

Danghnaeuz gou ndaej guh canghyw, gou siengj guh ok cungj yw ndeu，aeu daeuj yw cungj bingh seizneix yw mbouj ndei caeuq cungj binghdoeg caengz rox, hawj doenghduz caeuq vunzlai noix baenzbingh, ndaej ndang cangq ndang geng. Guh boux canghyw, aeu gwn ndaej hoj, bungz daengz saeh hoj, mbouj ndaej lau, engq mbouj ndaej mbouj bae guh, aeu mbouj doeknaiq, mbouj lau hojnanz, buekrengz bae guh.Guh boux canghyw, aeu rox naemj vihmaz guh mbouj baenz saeh caeuq rom gingniemh, mbouj ndaej mbat guh mbouj baenz saeh ne couh doeknaiq nini.

Mbat miz simmuengh ne, couh aeu haenqrengz buekguh, maj hung maj ak, caux ngoenz ndei hawj vunzlai.Gou siengj guh boux canghyw, seizneix couh aeu roengz- rengz doegsaw, hawj “aeu gou hag” bienq baenz “gou aeu hag”, vih aen simmuengh neix haenqrengz buekguh.

（Bwzswz Si Yougyangh Gih Yizfuh Siujyoz roek nienzgaep（1）ban Hij Lozvanz raiz Yangz Yenlinz hoiz)