Lungz lauxsae dwg lauxsae son Sawgun caeuq Sawcuengh ban dou，hix dwg banhcujyin dou.

Lungz lauxsae hajcib bi baedauq，hoeng ndaek bwn’gyaeuj de lij ndaemlulu，lij cug diuzbwn lumj yiengmax. Bingzseiz daiq fouq nganxgingq he， lij dawz fwngz aen goenh，de gyaez daenj buhyindung，loenglauq miz seiz hix raen de daenj vunj.

Couhdwg lauxsae bingzciengz baenzneix，de doiq dou hagsib iugouz gig yiemz：Daih’it, sijcih itdingh yungh gangbit. Dou daih’it ngoenz daeuj baudau，de couh daengq dou lo, byawz mbouj yungh gangbit sij cozyez， couh ngaiz linghsij. Gij iugouz neix , dou youq lajdiemj doeg sam bi mbouj caengz nyaengz gvaq，dou youq lajdiemj yungh maz bit sij cungj ndaej. Hoeng Lungz lauxsae naeuz, yungh gangbit sijcih cih yawj gvai, caiq miz gyonj bit he bingz maeg he couh cwxcaih yungh ndaej baenz bi lai, hawj bohmeh mbaet le haujlai ngaenz ne; daihngeih, moix hwnj bien govwnz moq cungj iugiuz dou aeu yawjgonq. Baenzlawz yawjgonq? Lungz lauxsae son dou, aeu dawz cihmoq dwk bingqyaem、dawz de gyoebswz、caiq bang de ra “baengzyoux” cih doxlumj, miz aen swz lawz mbouj rox maz eiqsei aeu bae ra sawloih. Lij miz moix ngoenz de cungj dingqsij haj aen cwzcuj caeuq coenz vah ndeu, miz aen lawz sij loek le, mwngz couh gag nyinhcaen sij ndei geiq roengzdaeuj, mboujnex, mwngz couh rox daengz gijmaz nyaengz fangz daj rap lo.

Lungz lauxsae mboujdan hagsib iugouz doiq dou yiemz, youq veiswngh fuengmienh di he mbouj lujlaj, dieg baetranz ban dou byawz baet gizlawz de cungj faen daengz vunz, mwngz siengj caeg gik ngeix hix mbouj gamj ngeix. Ndaw ban ngoenz aeu baet sam mbat, dieg naengh byawz uq le gag gipseuq, neix lij mboujsuenq lienz dou dahsau bwn’gyaeuj moix aen singhgiz aeu swiq geijlai mbat de cungj iugouz aeu guh daengz. De ciengz doiq dou naeuz, veiswngh mbouj guhndei, yungzheih miz bingh, baenz- bingh aeu yungh ngaenz yw mbouj suenq, lij nguh hagsib sou. Gou ngeix lauxsae gangj ndaej deng, couh lumj bi’gyai miz sinhgvanh bingh- doeg, haihag baenz song ndwen le dou cix ndaej dauqma hagdangz doegsaw, ngeix daengz aen haggeiz haenx, ndawsim couh gag liengz lo.

Lungz lauxsae couhdwg yienghneix hawj dou gingqgyaez, gou ndawsim laeb roengz gietsim: Majhung le hix lumj Lungz lauxsae ityiengh ma lajmbanj sonsaw.

(Vujsenh Yen Dungzlingj Cin Sinhlungz Siujyoz seiq nienzgaep Veiz Veivei boux lauxsae son’gyauq Lungz Ging’yuz)