Mwh sujgyaj, gou raen daeggo gwih danci suglili, hozhaenz raixcaix, yienghneix gou laemxsim hag gwih danci.

Singhgiz roek, daxboh daiq gou bae daengz aen gvangjcangz iq hag gwih danci. Mwh ngamq gwih hwnjbae ne, aenci lumjnaeuz mbouj dingq gangj, gengz gvaz gengz swix, gou naengh hix naengh mbouj onj saekdi, caeklaiq daxboh fuz aen diegnaengh. Gou laebdaeb gaem dawz gaenzci, din yungh rengz caij gaiq caijci, aenci nduknduk ndiengqndiengq hai baenaj, lumj gwn laeuj fiz nei. Gou sim gaenj raixcaix, angjfwngz gaem gaenj gaenzci cungj ok hanh lo, lauheiq mbouj siujsim couh deng laemx. Hoeng lau fangz bungz fangz, youq dieg vangok, aen gyaeujci sawqmwh gengz coh mbiengjswix, couh laemx roengzdaeuj lo, gou hix gaen laemx lo, angjfwngz lij deng log di naeng, roxnyinh sepyanyan. Yawj fwngz deng sieng gou, gou naemj：Gou gaenq siujsim hag dangqmaz lo, lij deng laemx, caen naemj mbouj daengz hag gwih danci baenzneix hoj, rox mbouj hag loba!

Daxboh lumjnaeuz yawj rox gou naemj gijmaz, gujli gou naeuz：“Mwngz cij ngamq hag, laemx saek baez cingqciengz lai lo. Daeuj, gou bang mwngz nem ndei gaiq yw canggojdeh, couh mbouj in lo. Gwih danci aeu lai lienh geij baez couh rox baenzlawz hawj de doxbingz lo. Hag doxgaiq cungj dwg daj mbouj rox daengz rox, ndawgyang aeu laebdaeb lienh, cij ndaej suglienh.” Gou dingq le, naemj：Daxboh naeuz ndaej deng, gou ngamq hag, guhlawz baenzneix vutvet ne? Yienghneix, gou youh hainduj dauqcungz hag gwih danci.

Daxboh fuz aen diegnaengh, gou fwngz gaem gaenzci, din caij gaiq caijci, aen danci laebdaeb mbitmbit mbiengmbieng hai baenaj, mwh gaenzci gengz coh mbiengjswix, aen- ndang hix gaen gengz coh mbiengjswix, naemj daengz haxbaenh, gou doq niuj aen gaenzci coh mbiengjgvaz, aenndang hix gaen cingq gvaqdaeuj, caen yungyiemj lai ha! Goj lienh goj lienh gou rox baenzlawz cij ndaej hawj aenci doxbingz: Danghnaeuz gyaeujci gengz coh mbiengj, doq dawz gyaeujci niuj coh mbiengj wnq. Couh yienghneix, baengh gij neix, gou couh mbouj lau laemx lo.

Doeklaeng, ngoenznaengz baez ndaej- hoengq, gou couh roengz laeuz lienh gwih ci. Roengzrengz geij ngoenz, gou hag rox gwih danci lo. Seizneix, gou gaenq caeuq daeggo caemh gwih ci ndaej lo!

(Gyanghsuh Swngj Suhcouh Si Gauhsinh Gih Sihsanh Saedniemh Hagdangz Yiz Yajgiz)