Ndaw ndwenngoenz majhung gou sou gvaq haujlai huqlaex, hoeng miz faenh huqlaex ndeu hawj gou ciuhvunz nanzlumz……

Mwh gou hwnj banhung youwzyenz, miz baez ndeu baenz feiyenz. Gou ngoenznaengz youq yihyen diuqcim, mwhhaenx dwg gvaq cieng doekgonq, daxboh daxmeh nyaengq hwnjban, ndaw rugvunzbingh hoengqvangvang dan miz daxdaiq buenx gou ndwi.

Ngoenz ndeu, miz vunz gvaek dou rugvunzbingh, gou laihnaeuz dwg husw ne, byawz rox daxdaiq haidou baez yawj, mbouj dwg husw, cix dwg boux baengzyoux ndei gou——Cingzcingz. Raen de daengx ndang dumzsubsub, yawj laezvij gwnz haiz, de haengjdingh byaij gvaq duenh roen uq ndeu. De mbouj dwg youq lajmbanj ma? Gou geizheih cam de: “Mwngz guhlawz daeuj ne?” Cingzcingz madmad raemxfwn gwnzgyaeuj, riunyumjnyumj naeuz:“Daxgoeng daiq gou daeuj, dingqnaeuz mwngz baenz gijmaz yenz, gou couh daeuj yawjyawj mwngz. Mwh byaij roen aenliengj deng ci vaih lo, daxgoeng gou youq baihlaj caj gou ne!” Cingzcingz gangj sat, mbon song aen gyaeqgaeqdoj ndawdaeh okdaeuj, oet haeuj ndawfwngz gou bae, naeuz:“Neix dwg mehgaeq ranz gou gag ok, hom raixcaix! Soengq hawj mwngz, muengh mwngz ndei vaiqdi, gou bae gonq lo!” Caengz gangj sat, Cingzcingz couh vadvad fwngz, byaij ok rugvunzbingh, lienz aen liengj ndeu cungj gaenj mbouj gip dawz.

Gou byaij daengz henz cueng, yawj raeblaeng Cingzcingz caeuq daxgoeng de yied bae yied iq, caiq yawjyawj song aen gyaeqgaeqdoj deng gaem ndat haenx, sim gou raeujrubrub. Ngaiz- banringz ngoenzhaenx miz song aen gyaeqgaeqdoj neix, hom raixcaix.

Gvaqlaeng, gou caeuq Cingzcingz caiq mbouj dox- raen gvaq, hoeng yiengh naj riunyumjnyumj de caeuq gyaeqgaeqdoj homfwtfwt, gou daengx ciuh nanzlumz……

（sam nienzgaep Cinz

Swjmuz）