Gaijgwz hailangh 40 lai bi doxdaeuj, ginghci Cungguek hwng- fwdfwd, ndwenngoenz vunzlai ngoenz ndei gvaq ngoenz, ndawbiengz miz bienqvaq, hawsingz miz bienqvaq, mbanjranz gou goj miz bienqvaq moq lailai.

Gou ceiq geiq ndaej, doenghbaez dou dauq ranzcoj gvaq cieng, gwnz loh cungj dwg naezsa, ci hai gvaqbae namhsa mbinfoenfoen, da cungj hai mbouj ndaej bae. Roenloh gumzgumz gamxgamx, baez ma ranz couh caeuq naengh gosanhceh ndijgaen. Gumz- boengz gwnz loh lailai, bungz daengz ne dungxsaej cungj yaek deng daenh okdaeuj. Fwn doek couh myagmatmat.Hoeng ngoenzneix, roennaez bienq baenz roenlaux ligcing, gvangqlangh bingzbwd, hai ci gvaqbae youh maenh youh vaiq, doenghbaez aeu aen cung ndeu, seizneix ngamq 20 faen cung couh daengz lo.

Mwh boh gou doekseng, dwg byai 20 sigij 70 nienzdaih, boh naeuz gou nyi gvaq, mwh iq de bae doegsaw hoj lai, gyausiz yaez lai, fwn doek couh laeuh raemx, ndaw gyausiz venj miz gaiq hwzbanj mboepmboep mbapmbap ndeu, ndawde miz geij aen daiz, dekdatdat. Seizneix raeuz daih vunz neix vuenyungz lai gvaq, guekgya naeuz bouxboux cungj aeu doeg sat siujyoz caeuq cuhcungh, haujlai hag- dangz cungj hwnq miz laeuz sonsaw lai yiengh yunghcawq, lauxsae ndaej yungh dennauj、gauhcingh douz- yingjyiz caeuq doxgaiq daihmoq daeuj sonsaw, hawj raeuz hag ndaej engq lai rox ndaej engq lai.

Mbanjranz goj bienqvaq lailai.Doenghbaez, vunzlai youq ranzvax、ranzhaz, ndwenngoenz hoj lai. Ngoenzneix, lajmbanj hwnq ranzlaeuz lig, ca mbouj lai ranzranz miz ci. Ndaw mbanj lij guh haujlai doenghyiengh hawj vunzlai guh’angq lienhndang, lij miz dieg cienmonz hawj bouxlaux guh’angq lienhndang dem, hawj bouxlaux gvaq ndaej ndei lai di.

Youq aen seizdaih vuenyungz neix, raeuz gwn imq daenj ndei mbouj you saek yiengh. Raeuz aeu doiq ndaej hwnj guekgya, guh ndei saeh dangq- naj, haenqrengz doegsaw, guh boux- vunz maenh’ak.

（Nanzningz Si Auvaz Siujyoz Ciz Swjyenz raiz Yangz Yenlinz hoiz）