Mwh gou bi ndeu, daxmeh cawx mbaw damj miz doz duzdouq ndeu hawj gou, ndeiyawj raixcaix. Gaxgonq, de goemq daengx ndang gou ndaej, hoeng seizneix ngamq goemq ndaej byongh ndang gou, caemhcaiq saek de menh- menh bienq damh, daj saekndingfug bienqbaenz saekndingmaeq daegbied damh. Gak swix baihgwnz mbawdamj lij gon geij congh, sojmiz conghgon cungj deng daxmeh aeu baengz saekheu nyib hwnjdaeuj, yak yawj raixcaix.

Ngoenz ndeu, gyoengq doengzhag daeuj ranz gou guhcaemz, yawj mbaw- damj gou, gyoengqde hainduj riu gou：

“Mwngz yawj, de heuh gaiq baengz haenx guh mbawdamj, haha! Caen dwg- riu!”

“Dwg ha, baenzneix yakyawj ha!”

……

Dingqnyi gyoengqde gangj, gou hojsouh raixcaix, caen naemj hawj mbawdamj gaeuq neix daj aen seiqgyaiq neix siu bae! Caj gyoengqde dauqranz le, gou couh gouz daxmeh cawx mbawdamj moq hawj gou. Daxmeh naeuz, dangh- naeuz gou hab seiz hab soq guh sat sojmiz hanghmoeg gwnz mbaw biuj hag saw dajveh ndwen neix, couh cawx mbawdamj moq hawj.

Vih mbawdamj moq, gou ngoenz- naengz nyinhcaen bae guh hanghmoeg gwnz mbaw biuj dajveh, cigdaengz miz ngoenz ndeu lauxsae youq dangz yawjsaw gangj cekveh 《Daxgoeng Itdingh Miz Banhfap》 hawj dou. Cek saw neix hawj gou naemj daengz daxboh ngoenznaengz hwnq romh dauq laep、roengzrengz guhhong caeuq daxmeh gaenxmbaet guenj ranz, yienghneix gou gaij cawjeiq lo. Gou yaek lumj daxgoeng ndaw gojgaeq nei, bonjfaenh doenghfwngz gaijguh mbawdamj.

Cuengqhag dauq daengz ranz, gou ra faggeuz、 fagcik、 bitsaek caeuq mbaw- damj gaeuq okdaeuj, hainduj gaijguh mbawdamj. Daih’it, gou bubingz mbaw- damj youq gwnzdieg, youh aeu mbaw gaen seiqfueng ndeu coq baihgwnz de. Yienzhaeuh gou yungh fagcik caeuq bitsaek ciuq henz mbawgaen seiqfueng veh sienq, riengzlaeng yungh faggeuz siujsim sisi ciuq diuzsienq veh ndei daet gijlai mbawdamj roengzdaeuj, mbaw damj iq miz doz duzdouq ndeu couh yienghneix guh baenz lo!

Daxmeh roengzban dauqranz, gou couh gip mbouj ndaej aeu mbawdamj gou guh okdaeuj hawj daxmeh yawj. Daxmeh doeksaet cam：“Lwg ha, neix dwg mwngz gag guh lwi? Baenz dahraix ha!” Gou sing hung naeuz：“Dwg ha, daxmeh. Gou mbouj aeu mbawdamj moq lo, neix couhdwg mbawdamj moq gou.”

Daxmeh lumh gyaeuj gou, sim’angq riu naeuz：“Lwggvai, mwngz caen maj- hung lo, rox insik doxgaiq lo.” Gou hix sim’angq riu lo, couh lienz duzdouq gwnz mbawdamj hix vuenheij riu lo.

Daj ngoenzneix hainduj, mbawdamj iq neix couh itloh youq gyaeujmbonq gou, lumjbaenz daxmeh seizseiz buenx gou.

(Huzbwz Si Vujhan Si Dahingh Daih’it Saedniemh Siujyoz ngeih nienzgaep Cwngz Cujhanz)