（ciep geizgonq）

“Gangj ndaej deng liux,” nyaenma sienseng naeuz, “hoeng gou camcam gyoengqsou, youh miz bouxlawz siengj okbae ni? Raeuz duzduz cungj vat ndaej ak, raeuz haemz baihrog, baihrog cungj dwg vunzdig. Raeuz yaek okbae, dwg aenvih deng bik, dwg aenvih raeuz aeu vih duz ndawranz raeuz ra gijgwn. Hoeng seizneix, gyoengq baengzyoux, raeuz miz dauq sezsih moq ndeu lo, raeuz miz sam diuz roen ancienz doeng coh sam aen cang, haenx dwg sam aen cang gwnz seiqgyaiq ceiq gyaqciq gyaeundei!”

“Caen dwg yienghneix,” duzvanh naeuz, “gou cungj yawjraen gvaq lo.”

“Sou rox neix daiqbiuj gijmaz ma?” Nyaenma sienseng gangj naeuz, “neix dwg naeuz raeuz bouxlawz goj mbouj yungh caiq ok baihrog giz laj daengngoenz bae lo.”

Seiqhenz aendaiz raq sing vanghvangh ndeu yiengj hwnj. Nyaenma sienseng ciep roengzdaeuj naeuz: “Yienghneix, gou iucingj sou daihgya louz youq gizneix, ciengxlwenx caeuq gou doxcaez youq.”

“Ciengxlwenx doxcaez youq!” Gyoengqde okrengz hemq.

“Goengmbwn ha, caen dwg ndei lai lo!” Yienghneix, duzdoq doiq maex de naeuz, “baz ndei gou, raeuz gvaqlaeng caiq hix mbouj lau ngaiz lwgyienz lo.”

Nyaenma sienseng naeuz: “Raeuz yaek youq lajdieg hwnq aen mbanj iq ndeu, ndawde miz honghgai, song mbiengj honghgai dwg ranz, duzvanh、duzoenj、duzdoq、nouguk caeuq nyaenma, moix duz cungj miz aen ranz bonjfaenh, gou moix ngoenz cungj aeu bae bang sou cawx doxgaiq, raeuz moix ngoenz cungj aeu lumj duzvuengz ityiengh gwnhaeux.”

Baez gangjvah neix le, sing angq hemq laebdaeb ndaej haujlai nanz.