Cozyez hanzgyaj guh sat lo, gou soengse ing youq gwnz sahfaz, itmienh gwn saejdaeuz itmienh hai densi, yaek hawj swhgeij simsoeng mbat he. Bienbien youq mwhde, daegnuengx byaij gvaqdaeuj lo, gou sawqmwh roxnyinh daengz miz cungj “mbouj gitleih” ndeu.

Gou caeuq daegnuengx singq- cingz mbouj doengz. De gyaez doengh, gou maij dingh; gou rox doxnyiengh, de cix manzgaengq, gijmaz saeh cungj nyiengh de cij ndaej, yienghyiengh cungj caeuq gou doiqdingj. Dahraix, daegnuengx raen gou yawj densi, couh cung gvaq- daeuj: “Gou hix yawj densi, dawz yauzgunggi hawj gou!”

Gou mbouj fugsaw naeuz: “Baengh gijmaz hawj mwngz ya? Byaijdeuz!”

Gou ndatheiq fid gaiqfwngz daegnuengx bae, de ceng mbouj gvaq gou, couh sing hung hemq dwk daejnga’nga. Daxmeh cingq youq ranzdajcawj cawj haeux, dingqnyi sing daegnuengx daej, vaiqvet byaij gvaqdaeuj.

“Mwngz nyiengh hawj daeg- nuengx mbouj ndaej ha? De lij iq, mwngz hawj de yawj yaep ndeu ma.”

“Baengh gijmaz hawj de yawj.”

“Aenvih sou mbouj doxdoengz.”

Daxmeh mbouj gangj coenz vah neix lij ndei, gangj le dauqfanj hawj gou huj lo, gou sing hung rongx: “Daj iq daengz hung, mwngz cungj naeuz gou caeuq daegnuengx mbouj dox- doengz. Couh aenvih de beij gou iq, moix baez cungj nyiengh de ha? Geij ngoenz neix gou ganj sij cozyez, mbouj yungzheih sij sat cozyez lo, siengj cuengqsoeng swhgeij yaep ndeu, hoeng mwngz mboujdan mbouj daej- liengh gou, lij yienghneix haeujcoengh daegnuengx, mwngz dauqdaej dwg mbouj dwg meh caenseng gou, gou haemz dai sou lo……”

Gangj sat gou couh buet haeuj rug bae, “bung” gven dou hwnj. Gou yied siengj yied vei, raemxda lae- byoegbyoeg, doeklaeng gingqyienz daejnga’nga hwnjdaeuj……

Siengjsiengj swhgeij, mwh iq bohmeh hix gig ndiepgyaez gou, gyoengqde itcig siujsim yupyup bungj gou youq ndaw fwngz. Cigdaengz daegnuengx seng okdaeuj, gou youq ndaw ranz ciemhciemh deng lawq lo. Gou youq gwnz densi yawj gvaq ndaw ranz miz song lwg, cungj miz doxdaemj doxbungq, mwhde gou mbouj dawz haeujsim, roxnyinh bohmeh caiq seng daegnuengx he, daengzcog miz vunz buenx, miz gijmaz saeh hix ndaej dox ciuqgoq. Byawz rox caeuq gou siengj haenx mbouj doxdoengz, daegnuengx youq ndaw ranz hengzvang hengzraeh. Bingzseiz cungj dwg gou nyiengh de, hoeng gou nyiengh baez youh baez, de cix baez youh baez daeuj nyex gou, gou gaenq nyaenx mbouj ndaej lo, gou dwgcaengz daegnuengx. Siengj dwk daej dwk, gou gingqyienz ninzndaek lo.

Sawqmwh, cienz daeuj sing roq dou he.

“Dahcej, dahcej…… hai dou.” Gou daj gwnz mbonq diuq roengz- daeuj, hai dou baez yawj, daegnuengx cingq ndwn youq bakdou, ndaw fwngz gaem bau giujgwzliz gou maij gwn he. Hoeng geizheih dwg, daegnuengx ngoenzneix yiengh de gig gvaiq, lwgda ronghlik doenghbaez mbouj raen lo, seizneix lwgda de mong’amq. Daeg- nuengx dawz giujgwzliz cuengq ndaw fwngz gou, gijmaz hix mbouj gangj, baenq ndang couh byaij bae lo.

“Nuengx, mwngz bae gizlawz?”

Gou lumj fatbag nei daih swenj: “Nuengx, mwngz gaej bae, dahcej caiq hix mbouj caeuq mwngz ceng lo, baezlaeng mwngz siengj gwn gijmaz, siengj yawj gijmaz, siengj boenz gijmaz, dahcej cungj hawj mwngz, ndei lwi?” Hoeng mboujguenj gou baenzlawz swenj, daegnuengx gyaeuj hix mbouj nyeux byaij bae lo……

Gou sim youh gaenj youh lau, daengx gyaeuj conh hanh daj ndaw loq ndiu daeuj lo.

“Bungbung, bungbung”, seizde cienz daeuj sing yaeng’yaeng roq dou. Gou hai dou, dwg daegnuengx.

“Dahcej, doiq mbouj hwnj, gou mbouj wnggai caeuq mwngz ceng yawj densi, gou loek lo, baezlaeng gou gaij. Dahcej, mwngz yienzliengh gou ndei lwi?” Daegnuengx caensim gangj sat le, ngaem gyaeuj roengzdaeuj.

Song coij raemxda daj ndaw da gou lae roengzdaeuj, ndawsim miz cungj feihdauh he gangj mbouj okdaeuj. Gou umj dawz daegnuengx: “Dwg dahcej mbouj ndei, dwg dahcej mbouj ndei” ……

(roek nienzgaep Ciz Swjgiz)