Caezgya cungj miz doxgaiq bonjfaenh gyaez ba! Lumjbaenz aen liengj daxboh okcai cawx dauqma, roxnaeuz batva youq henz dou siujgih cawx……Doxgaiq gou gyaez dwg aen gyapbangx iqet ndeu. Aen gyapbangx neix ngamq hung lumj rib- fwngzmeh, daengx aen yawj hwnjbae dwg saekhau, henz miz diemjraiz saekmoglamz, yawj hwnjbae mboujdan geizheih youh daegbied.

Seizhaenx gou ndaej roek bi, ranz gou sam vunz caez bae Daigoz Bujgizdauj youz guhcaemz. Gou youq gwnz sadan guh sabauj, dak ndit, caeuq daxboh doxgyaep guhcaemz……Guhcaemz vuenheij raix- caix. Mwh gou buet daengz gaiq diegsa mbouj miz vunz、cungj dwg nywj ndeu, sawqmwh yawjraen aen gyapbangx ndeu, yienznaeuz iq raixcaix, hoeng gou baez raen de, couh deng de yinxdawz lo. Gou guhmuengz mbon ndawdaeh dawz aen daehsuliu ndeu okdaeuj, haed youq gwnz go’nywj laux henz aen gyapbangx neix. Couh youq seizneix, mbwn sawqmwh doek fwn hung, byaj raez rumrum, gou guhmuengz buet bae coh daxboh daxmeh, caeuq gyoengqde daxcaez buet coh diemqlaeuj.

Mwh daengz diemqlaeuj, baihrog gaenq doek fwn hung lo, gou naemj：“Maqmuengh aen gyapbangx iq gaej deng fwn cung deuz……” Hoeng dauq naemj, ndawsim gag danq：“Ai! Youzcaih mwngz（gyapbangx） gag guenj bonjfaenh lo……”

Fwn hung roengz ngoenz ndeu, gofaex cungj deng baed laemx lo, go’nywj gova hix deng baed vaih lo, haujlai doxgaiq gyaeundei cungj deng baed deuz lo, ai! Gou caiq cienq gyaeuj yawj coh gaiq diegsa raen aen gyapbangx haenx, gizhaenx ngamq lw geij go’nywj raek ndwi, couh lienz go- nywj(go ceiq hung) gou haed aen daeh, hix deng fwn cung bae gizlawz mbouj raen lo. Gou yawj coh gaiq diegsa haenx mbat ndeu, sawqmwh, gwnz diegsa miz gaiq doxgaiq mig mbat ndeu, lij miz di ronghlwenq. Gyap- bangx dwg mwngz lwi？

Gou riengjret bae coh gaiq doxgaiq ronghlwenq haenx, baez daengz gizhaenx, gou yungh fwngz bae bungj gaiq doxgaiq haenx hwnjdaeuj, dwg aen gyapbangx iq! Gou angqyangz raixcaix, de gaenq deng fwn cung bae byongh ndeu lo, yienznaeuz de gaenq mbouj lumj gaxgonq yienghneix lwenqda lo, hoeng daj seizhaenx hainduj, de couhdwg doxgaiq gou ceiq gyaez, aenvih dan de dingj ndaej gaujniemh, de ceiq giengiengz.

(roek nienzgaep Haij Lizswngh)