《Canghdwknyaen Haijlizbu》dwg aen gojgaeq saenzgeiz ndeu, cawjgiek doeklaeng mbouj goq dailix bae gouq bouxwnq, daihgya hix rox bauqdap aencingz de, seiqseiq daihdaih、lwglwg lanlan cungj geiqniemh boux yingh- yungz neix.

Cawjgiek Haijlizbu mingzmingz rox swhgeij gangjok saedsaeh cingz- gvang le, souciengz mbouj ndei, doeklaeng lij dwg mbouj goq swhgeij bae gouq bouxwnq. De dai bae mbouj dwg mbouj miz saek di yiyi, de gouq le engq lai vunz. Youq duenh daihbet duzroeg gangj gvaq gawq vah ndeu:“Dou gienq mwngz daengz gizwnq bae ba! Ngoenzcog goengq bya hung neix couh yaek lak lo, raemxrongz mbouj rox yaek dumh dai geijlai sengmingh ne!” Gangjmingz cainanh yaek daeujdaengz, gij saenzgeiz gojgaeq engq haenq lo. Hawj gou ceiq gamjdoengh dwg daih- cib’it duenh Haijlizbu siengj:“Cainanh couh yaek daeujdaengz lo, danghnaeuz gou cij goq swhgeij deuznanh, hawj daihgya souh nanh, baenzlawz ndaej ne? Gou cingznyienh vutmingh swhgeij, hix aeu gouq daihgya okdaeuj.”Youq giz- neix gangjok de sienhsoh caeuq fouzsei okrengz. Doeklaeng Haijlizbu gangjok gij ginggvaq saedcingz caeuq baenzlawz ndaej ndaek rin neix, de hix bienq baenz ndaek rin hung ndeu. Gojgaeq doeklaeng, gyoengqvunz ra raen ndaek rin hung Haijlizbu bienq baenz haenx, dawz de buen bae gwnz dingjbya, heuh lwglan cungj daeuj geiqniemh Haijlizbu. Daj gizneix yienh’ok daihgya ndawsim gig ienqhoij, hix yienh’ok gyoengqvunz cinghseuq lauxsaed, gyoengqde gyo- mbaiq Haijlizbu dangqmaz.

Gij cingsaenz Haijlizbu vut mingh gouq vunz, fouzsei okrengz dijndaej raeuz hag. Daj gwnz ndang Haijlizbu, gou siengj hwnj Banzguj cauh diendeih, Saenznungz cimz bak nywj, Nijvah lienhrin bouj mbwn, gyoengqde cungj lumj Haijlizbu ityiengh fouzsei okrengz. Gou lij siengj hwnj Leiz Fungh it sim vih yinzminz fuzvu, “daxboh gohaeux”Yenz Lungzbingz, mwh binghraq gyoengq boux cansw daenj buhhau mbouj lau dai haenx, gyoengqde cungj miz gij binjciz caeuq Haijlizbu ityiengh fouzsei okrengz. Raeuz daih vunz neix, hix aeu hag cungj cingsaenz neix, daengzcog hung le vih guekgya vih sevei ok rengz.

(Sanglinz Yen Dafungh Cin Vangzcouh Siujyoz Cinz Yungjcunh boux lauxsae son’gyauq Vangz Gvei- yangh)