Bi’gvaq mboengq guekgingq, gou caeuq daxmeh baema ranzlaux. Ngamq roengz ci, couh dingqnyi ndawmbanj miz sing riu baenz raq baenz raq. Dwg miz gijmaz saeh angqyangz lwi?

Gou riengjret byaij daengz bakmbanj, gou anj lo, neix lij dwg ranzlaux mbanj dou lwi? Ranzlaux mbanj dou youq Majsanh Yen Gujlingz Cin Gyauzlauj Cunh Mbanjluzdwngh, yienzlaiz roen ndawmbanj cungj dwg roennamhsa, gumzgumz gamxgamx, danghnaeuz bungz doek fwn, haiz hau couh bienqbaenz haiz henj、haiz ndaem; ndawmbanj nyapnyaj lai dangqmaz……Hoeng seizneix yiengh mbanj bienq lai lo! Roen bienqbaenz roensuijniz bingz youh gvangq, seuqcengh dangqmaz; song henz roen ndaem miz valwgbaenq ronghsien.

Dwg gijmaz hawj aenmbanj hojndoq dou bienqbaenz yienghneix gyaeundei ne? Daiq gij ngeizvaeg neix, gou gaenjgip byaij haeuj mbanj bae. Youq laj gorungz hung gyaeujmbanj, bang daxgoeng daxbuz ndeu cingq humx naengh gangjgoj. Yienzlaiz sing riu dwg daj gyoengqde gizhaenx cienz okdaeuj!

“Haeuxyangz ranz dou seizneix sou ndaej lai, daj ngoenzlwenz nyaengq daengz seizneix cij ndaej- hoengq caeuq gyoengqsou gangjgoj!” Lanz daxgoeng riuhehe naeuz.

“Dwg lo! Daj haemhlwenz daengz haxbaenh, cunhcihsuh daiq lauxbanj daeuj cawx haeuxyangz, dou cang le sam aen ci hung.” Lanz daxbuz hix naeuz.

“Lan gou cuengqgyaj, daegdaengq daj ndaw- singz dauqma bang dou sou maenz. De lij naeuz maenz ranzlaux raeuz mboeng、van、hom, youq cauhsi ndawsingz vunz gyaez cawx lai.” Cangh bohlungz miznaj naeuz.

“Ndwenngoenz mbanj raeuz ngoenz ndei gvaq ngoenz, gaenq mbouj dwg aenmbanj hojndoq lo!” Lij daxgoeng daengj lwgfwngzmeh naeuz, “gyo’mbaiq dangj、 gyo’mbaiq guekcoj hawj aenmbanj raeuz ndaej baenzmiz. Dangjcunghyangh guh vutgungz gunggeng hengzdoengh, hawj ndwenngoenz raeuz ngoenz ndei gvaq ngoenz, aenmbanj hix ngoenz gyaeundei gvaq ngoenz, gyoengq bouxcoz cungj haengj dauqma guhhong lo.”

Sing riu goksasa rwenzhap youq gwnzmbwn aenmbanj, duzroeg gwnzfaex heuh cici, lumjbaenz hix vih aenmbanj dou bienq lengj vuenheij ne!

Dingq daxmeh naeuz, ranzlaux dou yienzlaiz ndoq dangqmaz, guekgya guh vutgungz gunggeng le, ranzmbanj dou ngoenz gyaeundei gvaq ngoenz、ngoenz miz gvaq ngoenz lo.

“Gyoengq daxgoeng daxbuz, gou dauqma lo. Ranzmbanj raeuz caen gyaeundei ha!”

“Dwg ha, lwglan ha, gyoengqsou aeu rox gyo’mbaiq dangj caeuq guekgya, roengzrengz doeg- saw, bauqdap guekcoj.”

“Gou haengjdingh bae guh. Gwn raemx mbouj lumz boux vat cingj, dauhleix gou rox.”

“Gou caeuq guekcoj gou, lumj haij caeuq dujva raemxlangh……” Seizneix gou nyaenx mbouj ndaej naemj daengz diuz go sugrox neix, gou caeuq guekcoj、ranzmbanj sim doxlienz.

(Nanzningz Si Sihyanghdangz Gih Vansiu Siujyoz Lanz Dunghhoz)