（ciep geizgonq）

Doeklaeng, duzvanh ndwn hwnq: “Vaiq bae aeu cenj daeuj, okrengz naeuz ‘ndoet liux’. Gou siengj hawj sou cungj ndwn hwnqdaeuj, vih boux baengzyoux ndei raeuz——nyaenma sienseng ndoet liux, aenvih ngoenzneix dwg de gouq diuzmingh raeuz.”

“Vih nyaenma sienseng ndoet liux!” Gyoengqde cungj ndwn hwnqdaeuj, yaengx cenjlaeuj okrengz hemq naeuz.

Gaenlaeng, maex nyaenma launyaenq ndwn hwnqdaeuj, naeuz: “Gou mbouj siengj youq gizneix yienjgangj, gou dan siengj gangj coenz vah ndeu, couhdwg, gvan gou dwg duz nyaenma ak lai ndeu.”

Daihgya cungj dopfwngz angq hemq nyauznyauz.

Ciep roengzdaeuj, nyaenma sienseng ndwn hwnqdaeuj lo: “Gijgwn ndeigwn neix.” De hai bak gangj naeuz, liuxle youh dingz roengzdaeuj, de saekwk mbat hunghung ndeu, daihgya cungj dopfwngz riuhaha.

“Gijgwn gyaeundei neix, gyoengq baengzyoux gou,” De laebdaeb gangj, “dwg Bozgizswh、Banghswh caeuq Bijwnh sam boux sienseng neix dakdaih raeuz.”

Sing angq hemq caeuq sing riu engq sang lo.

“Gou maqmuengh sou lumj gou nei maij de.” De youh saekwk baez raezraez ndeu.

“Miz heiq lij dwg huz okdaeuj ndei gvaq.” Duzvanh naeuz.

“Gyo’mbaiq mwngz.” Nyaenma sienseng mbe bak riu naeuz, “mbouj gvaq, gyoengq baengzyoux gou, raeuz seizneix baetmaed di. Raeuz lij dwg aeu naemjnaemj, ngoenzcog、ngoenzrawz caeuq gij saeh gvaqlaeng ba. Danghnaeuz raeuz okbae, raeuz couh yaek deng gaj dai, deng lwi?”

“Deng!” Gyoengqde okrengz naeuz.

“Raeuz deuz caengz ndaej mij gyae, couh yaek deng cungq nyingz dai.” Duzvanh naeuz.