（ciep geizgonq）

Sawqmwh, aen ciengzgingj gyaeundei caemhcaiq hawj vunz doeksaet ndeu baij youq baihnaj gyoengqde. Hoihlaeuj ngamqngamq hainduj, neix dwg aen ranz gwn haeux gig hung youq lajnamh vat baenz ndeu, aen ranz gwn haeux cungqgyang baij miz aen daiz gwn haeux hung ndeu, doenghduz humx naengh haeuj aen daiz gwn haeux ceiqnoix miz ngeihcib gouj duz, gyoengqde dwg maex nyaenma caeuq sam duz nyaenma lwg, maex duzvanh caeuq sam duz vanh lwg, duzoenj、maex duzoenj caeuq seiq duz oenj lwg, duzdoq、maex duzdoq caeuq seiq duz doq lwg, nouguk、maex nouguk caeuq roek duz nouguk lwg. Gwnz daiz baij rim gaeq、bit、hanq、galab、nohlab caeuq lauxbaeg nding. Daihgya cingq saeg gwn doenghgij doxgaiq ndeigwn neix.

“Bouxgvan ndei gou,” Maex nyaenma doq hemq, doq diuq hwnj- daeuj gotdawz nyaenma sienseng, “dou caj mbouj ndaej lo, cingj yienzliengh!”

Liuxle de youh gotdawz duz nyaenma ceiq iq haenx. Maex duzvanh gotdawz duzvanh, daihgya youh doxgot mbat ndeu.

Aenguenq cang laeuj mak- bingzgoj youq ndaw raq sing hemq vuenheij ndeu deng riuj hwnj gwnz daiz, nyaenma sienseng、duzvanh caeuq duz nyaenma ceiq iq doxcaez naengh roengzdaeuj lo.

Mwngz haengjdingh geiq ndaej moix duz naengh youq gizneix cungj haujlai ngoenz mbouj ndaej gwn doxgaiq lo. Gyoengqde iek yaek dai, ndigah seizneix gyoengqde gijmaz cungj mbouj gangj. Youq mwh gyoengq doenghduz “gung- hoenx” doenghgij doxgaiq ndeigwn neix, dan dingq ndaej nyi sing geux gacab gacab gacit gacit.