Gou geiq ndaej seizhaenx sam seiq bi, gou aenvih mbwq lai, ndigah couh muenz daxboh daxmeh buet okbae guhcaemz lo, gou youq baihrog yawjraen aen danci dahcej, youh naemj daengz yiengh dahcej gwih ci, roxnyinh ndei loengh raixcaix, doeklaeng couh benz hwnj aen danci bae.

Hoeng aenvih gou ndang daemq iq, ndigah naemj benz hwnjbae caen hoj dahraix ne, youq mwh gou benz daengz byongh, ga gou caij hoengq lo, gou laemx roengz dieg bae, seizhaenx aiq dwg gyaeuj gou bungq daengz dieg, gou ngunh bae lo.

Mwh gou singj gvaqdaeuj gaenq youq ndaw yihyen, gou baez ngiengx gyaeuj, raen haujlai caencik sim- gaenj dangqmaz, seizhaenx daxmeh gou daej lo, daxboh itcig youq henz daxmeh nai naeuz mbouj miz saeh. Gou gag naemj:“Danghnaeuz gou rox baenz- neix, gou couh mbouj bae benz lo.” Doeklaeng, dahcej raen gou couh hemq：“Dahnuengx singj gvaqdaeuj lo, dahnuengx singj gvaqdaeuj lo.” Caezgya dingqnyi bouxboux buet gvaqdaeuj yawj, daxmeh dingqnyi gou singj couh mad raemxda, naj riunyumnyum. Ginggvaq baez neix, gou rox hit lo, daengz seizneix gou cungj mbouj gamj gwih danci lai.

Seiz iq bouxboux cungj miz angqyangz、nanzgvaq、duenhlienh、rox hit. Seiz iq bouxboux cungj mbouj doxdoengz, miz mbangj vunz seiz iq angqyangz, hoeng miz mbangj vunz seiz iq hojgvaq.

(ngeih nienzgaep Linz Yoz)