Vunz caen geizgvaiq, seiz iq, cungj siengj majhung vaiq di, hoeng majhung le, youh dauqsiengj seiz iq.

Geiq ndaej miz ngoenz seizhah ndeu, gou caeuq gyoengq baengzyoux caez guhcaemz, seizhaenx dou youq ndawndoeng faexndoek guh “it, ngeih, sam, boux vunzfaex” youzheiq. Dou sien cai “ndaekrin faggeuz baengz, ndaekrin faggeuz baengz……” Doek- laeng Siujmingz saw lo. Gou caeuq Hungzhungz、Lili lijmiz Yiujyiuj byaij daengz baihlaeng diuz sienq ndeu, dou ndwn youq baihlaeng sienq ndaej seizbienh doengh, hoeng ok sienq le, couh mbouj ndaej doengh lo.

Hainduj guhcaemz lo, gou caeuq Yiujyiuj daih’it boux yamq ok sienq, seizneix Siujmingz ngamq geq ndaej, couh lumj raq rumzgeujgaeq ityiengh gig vaiq cienq ndang gvaqdaeuj. Lwgda cim dwk gou caeuq Yiujyiuj, hoeng dou song boux mbouj doengh saek di, Siujmingz mbouj fatyienh doenghdanh, couh cienq ndang gvaqbae, gou caeuq Yiujyiuj cij ndaej soeng gaemz heiq ndeu.

Dou song boux laebdaeb baenaj, seizneix Hungzhungz caeuq Lili hix ndaej ok sienq lo, Siujmingz youh caiq cienq ndang gvaqdaeuj, Hungzhungz aenvih gen miz di haenz, cingq yaek gaeu mbat ndeu, cix deng Siujmingz gaemh dawz lo. Hungzhungz cij ndei gig mbouj fugheiq dwk naengh gwnz rin bae. Siujmingz cienq ndang gvaqbae le, gou caeuq Yiujyiuj yiengq baihnaj yamq song yamq, couh dingz roengzdaeuj lo. Siujmingz caiq cienq ndang gvaqbae seiz, dou youh laeglemx yiengq baihnaj yamq song yamq, hoeng Yiujyiuj cingq yamq seiz, mbouj siujsim caij deng ndaek rin ndeu vad laemx lo, Siujmingz raen le hix raengcawz de lo. Baezneix cij lw gou caeuq Lili lo, gou sim siengj:“Lili caen dwg boux ak ndeu, hoeng gou caeuq de beij wnggai ndaej hingz.”Dou ciep dwk byaij, daengz byongh seiz, dou dox yawj yaep ndeu, lumj dwg naeuz swhgeij itdingh hingz. Yaep ndeu, Lili couh gyaep hwnj gou lo, gou ciemhciemh roxnyinh daengz gou couh yaek saw lo, ndawsim gip raixcaix, seiz ndeu mbouj rox baenzlawz guh, seizneix Lili cix daekeiq dwk riu hwnjdaeuj. Gou laihnaeuz gou haengj- dingh saw lo, siengj mbouj daengz de nyaenx mbouj ndaej baez haetcwi, gou loeklak couh ndaej hingz lo.

Seiz iq geijlai mizyinx, mbouj youheiq gijmaz, gou caen siengj seizgan ciengxlwenx dingz youq seiz iq angqyangz haenx ha!

（Sanglinz Yen Dafungh Cin Vangzcouh Siujyoz haj nienzgaep Couh Lingzyij boux lauxsae son- gyauq Lij Haijyen）