Baez gangjdaengz gij saehgonq seiznyez, ndawuk gou couh yienh’ok gij saeh mizyinx haenx.

Geiq ndaej gou haj bi seiz, gou caeuq baengzyoux Leizleiz caez bae gaeb mbungqmbaj, mbungqmbaj mbin ndaej geijlai vaiq, baenzlawz gaeb ndaej dawz ne? Hoeng dou cungj naemj gaeb mbungqmbaj, itcig gyaep mbouj dingz, doeklaeng gyaep daengz aen suen byaek daxdaiq, gyaep yaep ndeu, mbungqmbaj lij dwg mbin deuz lo. Dou couh dingz din roengzdaeuj, ya, ndawsuen byaek daxdaiq baenzlawz miz baenzlai gorum. Gizsaed haenx mbouj dwg gorum, dwg coenggep daxdaiq ngamq ndaem. Hoeng seiz- haenx gou lienz coenggep caeuq gorum cungj mbouj rox, ndawsim siengj: Daxdaiq ngoenzngoenz daeuj ndawsuen byaek guhhong, geijlai dwgrengz ha, nanzdauh gou mbouj wnggai bangbang de ma? Yienghneix gou caeuq Leizleiz dajsuenq caez bang daxdaiq ciemz gorum. Mbouj yaep ndeu, dou couh ciemz gorum liux lo. Dou cingq yaek baema ranz, couh youq bakdou suen byaek bungq raen daxdaiq, daxdaiq yawjraen dou, couh cam:“Sou youq ndawsuen byaek gou guh gijmaz?”Gou riu dwk gangj:“Daxdaiq, dou cingq bang mwngz ciemz rum ne!” Daxdaiq youh cam:“Gizlawz miz gorum, ngoenzlwenz gou mbouj dwg ngamq cawz gorum ma?” Gou riu dwk vix coh coenggep baihhaenx gangj:“Youq gizhaenx.” Daxdaiq doeksaet dwk byaij gvaqbae baez yawj, song fwngz bek ga gangj:“Aiya, gij coenggep neix gou ngamq ndaem roengzbae, baenzlawz couh deng sou ciemz hwnjdaeuj lo?” Gou doeksaet cam:“Gijmaz? Neix dwg coenggep?”Daxdaiq gangj:“Neix couh- dwg gij coenggep sou baeznaengz gwn haenx.”Gou buenq saenq buenq ngeiz buet gvaqbae, youq bien loh seizbienh gaem dawz gaem gorum ndeu, caiq caeuq coenggep baez doiqbeij, lumh- lumh, nyouqnyouq, caen dahraix mbouj ityiengh. Gou mbouj ndei eiqsei doiq daxdaiq gangj:“Gou lij dwg caiq bang mwngz ndaem ba!”

Doeklaeng, dou couh caiq bang daxdaiq ndaem coenggep, vat gumz, dwk bwnh, moek namh, youh dawz coenggep ndaem roengzbae. Yaep ndeu couh ndaem ndaej le, daxdaiq daengj fwngzmeh haenh dou:“Ngoenzneix suenq dwg lauzdung gyauyuz ba!”Dou cungj riu lo.

Gij saehgonq seiznyez, cang rim aen sim gou, youq ndawsim gou gig dijbauj, hawj gou louzlienh dangqmaz.

(Sanglinz Yen Dafungh Cin Vangzcouh Siujyoz haj nienzgaep Yangz Ginhvei boux lauxsae son- gyauq Vangz Gveiyangh)