（ciep geizgonq）

17 Hoihlaeuj Hunghoengh

Gyoengqde dauq roengz daengz deihgoengq le, dingz roengzdaeuj yaep ndeu, caj nyaenma sienseng saek aen congh gwnzciengz haenx hwnj. Nyaenma sienseng doq dawz cien oet haeuj giz gaeuq bae, doq gag gangj mboebmboeb: “Gou haengjdingh ndaej cimz daengz gij laeuj makbingzgoj ndeigwn haenx moq.” De naeuz, “duz nou haenx caen dwg duz nou yahcienh ndeu!”

“De mbouj roxsoq saekdi!” Duzvanh naeuz, “sojmiz nou cungj mbouj roxsoq!”

“Gou lij caengz raen gvaq saek duz nou roxsoq bw! Caemhcaiq de goj gwn lailai lo.” Nyaenma sienseng naeuz sat, dawz gep cien ceiq sat oet ndei, “ndei lo, seizneix dauq ranz gwn laeuj.”

Gyoengqde riuj hwnj guenq laeuj makbingzgoj haidin lo, nyaenma sienseng byaij daeuz, duz nyaenma ceiq iq baiz daihngeih, duzvanh byaij ceiq laeng. Gyoengqde riengz deihgoengq riengjvaiq byaij baenaj, ginggvaq giz vangung doeng coh aen canghung Banghswh, youh ging- gvaq aen rongzgaeq 1 hauh Bozgizswh, liuxle youh byaij gvaq roen raezraez. Gyoengqde rox, maex nyaenma cingq youq giz duenh roen neix doeng coh haenx caj gyoengqde ne.

“Riengz hwnj, gyoengqsou.” Nyaenma sienseng okrengz gangj, “raeuz yaek daengz lo. Siengjsiengj dwg gijmaz youq gyaeuj wnq caj raeuz, caiq siengjsiengj gij guenq raeuz daiq bae ranz neix cang miz gijmaz. Baez neix aiq hawj maex hojlienz gou vuenheij lo.”

Nyaenma sienseng doq byaij doq ciengq, “Gou riengjvaiq ndonj dauq ranz baez moq, dauq bae daengz henzndang bawxmoq gyaeundei gou. Youq mwh de gwn gij laeuj makbingzgoj neix roengzbae gvaq le, de couh yaek cingsaenz saengq hwnj, ndangsim soeng’yungz.”

Duzvanh goj gaen de ciengq hwnjdaeuj lo: “O, maex duzvanh hojlienz, de iek dwk baenqlulu, heiq ok lai diem noix, dan aeu gwn gij laeuj makbingzgoj neix roengzbae, de couh yaek miz cingsaenz lailai!”

Gyoengqde doq ciengq go, doq heux gvaq giz vangung ceiq sat.