2012 nienz Siz Ginbingz dang cungjsuhgi le, daeujdaengz gwzming laujgih Huzbwz Fubingz nai bouxhoj seiz naeuz: “Siucawz hoh gungz- hoj, gaijndei minzswngh, saedyienh doengzcaez fouqmiz, dwg gij bwnjciz iugouz sevei cujyi. Doiq gyoengq bouxhoj, raeuz aeu daegbied gvansim yawjnaek, daegbied in’gyaez, daeg- bied gvansim, lai siengj banhfap bang gyoengqde baiz you gej nanz, dawz gij ancienz yung’yiemj vunzlai seiz- seiz cuengq youq ndawsim, dawz gij raeuj dangj caeuq guekgya soengq daengz cien gya fanh hoh.”

Gangj vah saedcaih, youq ciengz duetgungz gunggeng gyukhuhu neix ndawde, ranz gou ndaej souh’ik ceiq daih.

Gou daj aen mbanj gungzhoj ndeu daeuj, ranz gou gungh miz 5 boux vunz, miz daxmeh、song dahcej、daeggo caeuq gou. Youq gou haj bi bi haenx, daxgoeng ngamq gvaqseiq ndaej 3 ndwen, daxboh baenz bingh naek yw mbouj ndei hix lizhai gwnzbiengz lo, daengx ranz vunz cungj siengsim yaek dai, daegbied dwg daxmeh baenzngoenz daej.

“Daxmeh, dou siengj daenj buhmoq gvaqciet.”

“Daxmeh, dou baenzlawz cungj mbouj ndaej bae laeng yahdaiq baiq- cieng?”

“Daxmeh, ranz Siujfangh ciengz gwn gungq hung, dou hix siengj gwn.” ……

Dou nienzgeij iq, mbouj roxsoq, ciengzseiz nyex daxmeh siengsim.

2016 nienz, ranz gou dinghbaenz ranzgungzhoj. Miz vunz naeuz, ndaej dinghbaenz ranzgungzhoj, miz cwngfuj bangcoh, ndaej yiengjsouh gij bangfuz cwngcwz dangj, dwg gienh saeh sim- angq ndeu, hoeng youq ndawsim gou, cix roxnyinh daengz simcieg caeuq simsoemj. It dwg gou mbouj rox baez banggungz neix doiq ranz gou miz gijmaz yungh? Ngeih dwg sawq siengj, bouxlawz mbouj siengj miz aen gyaranz caezcingj ndeu? Bouxlawz mbouj siengj gvaq saedceij vuen- yungz? Bouxlawz mbouj siengj youq dangqnaj gyoengq doengzdoih de mauqcaq?

Hong bangfuz hainduj le, boux bangfuz ganbu Lanz Fung daxnax couh ciengzseiz daeuj ranz gou, moix baez daeuj, de mbouj dwg daiq haeux couh dwg daiq mienhdiuz, mizseiz dwg huzyouz, lij miz gij saejdaeuz gou gyaez gwn haenx. De baez daeuj, couh caeuq meh gou gangjgoj cam nit cam raeuj, dazyinx meh gou baenzlawz duet gungz bienq fouq. Ndaej daengz de baenzlai gvansim, dahcej gou ndaej doeg gauhcungh lo, daeggo caeuq cej- ngeih hix hwnj cuhcungh lo.

2017 nienz, nienzgeij gou daengz seiz hwnjhag lo, hoeng ranz dou liz hagdangz daihgaiq 4 goengleix, daxmeh moix ngoenz yungh song aen cungdaeuz ciepsoengq gou, nguh hongreih youh nguh hongranz, cin- cangj Veiz boh’au rox gij saeh neix le, dauqcawq bang gou ra hagdangz, ndaej daengz de bangcoh, gou daeuj- daengz Cin’anh Siujyoz aen hagdangz miz dieg ninz dieg gwn neix doegsaw, yienghneix le meh gou couh mbouj yungh moix ngoenz daeuj ciepsoengq gou lo.

2019 nienz, Hocouh daengz Bahmaj gauhsuz goengloh ginggvaq bakdou ranz gou, ndawcin naemj daengz gij saedsaeh gungzhoj ranz gou, lienzhaeh Ho Bah Gauhsuz Cijveihbu, hawj daxmeh gou bae gizhaenx guhhong, yienghneix le, daxmeh couh ndaej ciuqgoq ndawranz, youh ndaej di ngaenz dem.

Seizneix, gij swnghhoz ranz gou caeuq gyoengq vunzmbanj ityiengh, gwndaenj mbouj you mbouj heiq, gou hix angqvauvau youq hagdangz hagsib.

Gou docih dangj, docih cwngfuj, dwg gyoengqde bang dou duetgungz bienq fouq, faenh cingz neix, gou baenz ciuhvunz cungj lumz mbouj ndaej.

(Disuh Cin Cin’anh Siujyoz Cinz Yanghsui boux lauxsae son- gyauq Veiz Couhyiz Vuz Yungzbingh)