Bouh hungzginh cangzcwngh lizsij ndeu, couhdwg bouh lizsij ndeu, de naeuz gij ginhminz gamjcingz naekna. Youq Huznanz Yujcwngz Yen Sahcouh Cunh, 3 boux hungzginh mehmbwk youq ranz bouxlaux ndeu dozninz, mwh yaek lizhai, dawz mbawdenz bonjfaenh dan miz haenx raed roengzdaeuj dingz ndeu hawj bouxlaux. Bouxlaux naeuz, gijmaz dwg Gungcanjdangj? Gungcanjdangj couhdwg swhgeij miz mbaw denz ndeu, hix aeu raed bae buenq mbaw hawj beksingq.

1934 nienz 11 nyied, hungzginh cangzcwngh ginggvaq Sahcouh Cunh, 3 boux hungzginh lwgmbwk youq ranz bouxlaux ndeu dozninz, bouxlaux heuhguh Ciz Gaijsiu, daengz ranz bouxlaux yawjraen gwnzcongz haemq yaez de dan miz gienh baez ndeu caeuq mbaw denzdauq vaih ndeu, sam boux hungzginh couh dawz mbawdenz dan miz haenx okdaeuj, caeuq song mehlwg Ciz Gaijsiu doxcaez hoemq. Gvaq geij ngoenz le, budui yaek lizhai gaxgonq, 3 boux hungzginh mehmbwk couh doxyaeng dawz mbawdenz gyoengqde soengq hawj Ciz Gaijsiu, hoeng Ciz Gaijsiu gangj gijmaz cungj mbouj aeu. Mwngz doi mwh gou couh nyiengh, miz boux hungzginh mehmbwk ndeu, couh raed mbawdenz baenz song buenq, dawz buenq ndeu gyauhawj Ciz Gaijsiu.

Gij goj “buenq mbawdenz” hawj beksingq rox le Gungcanjdangj, dawz dangj dangguh vunz swhgeij. Cingq aenvih miz beksingq cihciz caeuq yunghhu, dangj raeuz cijndaej byaij gvaq gij roen ronghsag, aeundaej cingzcik hungmbwk. Cunghgoz Gungcanjdangj genhciz vih yinzminz fuzvu, mbouj dandan dwg gawq goujhau ndeu, cix dwg genhciz mbouj cuengqsoeng. Raeuz gaenq cienzmienh hwnqbaenz aen biengz siujgangh, cieplaeng aeu vih cienzmienh hwnqbaenz aen guekak sevei cujyi yendaiva bae haenqguh, hawj beksingq gwndaenj engqgya fouqmiz、 engqgya vuenyungz.

Seizneix, gou dwg boux sausenh duiyenz ndeu, gou rox, sausenhdui dwg aen dangj cujciz lwgnyez, gou wnggai vih Gungcanjdangj ok faenh rengz swhgeij. Cawz le rengz guh ndaej daengz bangcoh bouxwnq, seizneix gij yinvu ceiq youqgaenj de couhdwg hag ndei bae, hag rox gohyoz vwnzva cihsiz engq lai, yawhbienh daengzcog hoizbauq beksingq, hoizbauq dangj caeuq guekgya.

(Vanzgyangh Mauznanzcuz Swciyen Sih’wnh Cin Yinzhoz Siujyoz seiq nienzgaep Luz Haijcingz boux lauxsae son’gyauq Veiz Gyahmanj)