Lumj mbungqmbaj mbin gvaq cazva, lumj raemxmboq lae gvaq ndawlueg, gou moix baez dauqngeix gij saehyinx seiziq, ndawsim couh roxnyinh angq dangqmaz, seizneix gou couh gangj- gangj gij saehyinx seiziq ba.

Youq seiz ngoenzseng cib’it bi gou, dou caeuq daxboh daxmeh doxyaeng: Dou hix majhung lo, hawj dou geij boux lwgnyez gag doenghfwngz guh dangauh ngoenzseng. Sojmiz doxgaiq youz dou gag bae ra. Daxboh daxmeh mbouj naeuz gijmaz couh dapwngq lo.

Dou daeujdaengz gwnzgai ndaw cauhsi senj doxgaiq guh dangauh. Cix fatyienh yienhsaed caeuq gou naemj doxca hung lai. Aen cauhsi neix gig hung, dou youq ndawde luenh byaij, buenq ngoenz cungj caengz cawx ndaej saek yiengh doxgaiq. Yienghneix gou guh’ok aen gietdingh ndeu: Raiz mbawdan ndeu aeu cawx gijmaz lai, caemhcaiq faenhong gapguh, dangq boux dangq bae cawx doxgaiq. Couh yiengh- neix, caezgya roengzrengz, dou gig vaiq couh cawx ndaej doxgaiq liux.

Madaengz ranz, dou hainduj guh dangauh, dub gyaeqgaeq、gyaux mbamienh……Doeklaeng dou dawz de ndingq roengz ndaw denfanbauh bae. Dou lij yungh seiz caj naengj dangauh dinjdet neix guhcaemz, loengh doxndoj、duzroemh gaeb gaeqlwg、duzbya sahyiz gwn vunz, guhcaemz yinx dangqmaz.

Daengz gwn dangauh lo, dou hai denfanbauh, va, dangauh guh ndaej youh hung youh hom, dou angq raixcaix. Daengx ranz bouxlaux lwgnyez cungj haenh dou guh dangauh baenzgwn lai, dou dingq le, angqyangz dangqmaz.

Binghsinh gangj gvaq: Bouxboux cungj miz gij saehyinx seiziq swhgeij, vaiqvued hix ndei, haemz- hoj hix ndei, cungj dwg gij ndaejgeiq ceiq laeg de. Lwgnyez gag guh donqngaiz ngoenzseng, caen dwg gij dauqngeix vuenyungz seiziq ha!

(Sanglinz Yen Dafungh Cin Vangzcouh Siujyoz haj nienzgaep Moz Yenz boux lauxsae son’gyauq Vangz Gveiyangh)