（ciep geizgonq）

“Ndei, fuhyinz, daeuj lo.” Boux mehmbwk hunghung haenx gangj sat, daj gwnzgyaq aeu roengz aen guenq daihngeih.

Nyaenma sienseng gag siengj: “Danghnaeuz aeu guenq dem, de couh yaek yawjraen dou.”

De rox ndaej daengz duz nyaenma ceiq iq gaenjgaenj dep dwk aen ndang de, cingq aenvih vueng saenz dedded.

“Song guenq doh ma, Bijwnh fuhyinz? Mboujne gou aeu sam guenq bw?”

“Dai lo, Meizboh’wz, gou mbouj guenj gijhaenx, dan aeu mwngz vaiq di couh ndaej.”

“Baenzneix couh aeu song guenq ndaej lo,” Boux mehmbwk hunghung haenx naeuz, seizneix dwg de gag gangj gag naeuz, “fanjcingq de goj ndoet doh lai lo.”

De fwngz ndeu riuj guenq laeuj ndeu, diuz faex laenh mba haenx naep youq laj mbiengj goekeiq ndeu, byaij coh lingh mbiengj ranz laj- dieg. De youq baihnaj aenlae dingz roengzdaeuj yaep ndeu, doq yawj seiqhenz, doq nyouq heiq.

“Gizneix youh miz nou lo, Bijwnh fuhyinz, gou nyouq ndaej ok gij heiq gyoengqde.”

“Baenzneix couh roengz yw hawj gyoengqde dai.”

“Fuhyinz, roengz yw?”

“Mwngz rox ywdoeg youq giz- lawz.”

“Dwg, fuhyinz.” Meizboh’wz naeuz.

De menhmenh benz hwnj lae, youq gwnzlae yawj mbouj raen ngaeuz, dou “bungz” mbat ndeu deng gven haeuj lo.

“Vaiq,” Nyaenma sienseng naeuz, “duz riuj guenq laeuj ndeu deuz loq vaiq.”

Duznou youq gwnz aen gyaq sangsang yomjyomj hemq naeuz: “Gou caeuq sou gangj gijmaz gvaq, sou ceng di ngaiz gaeb, mbouj dwg ha? Sou hawj gienh saeh neix bienq vaih bae, daj seizneix hwnj, sou mbouj cinj dauqma gizneix moq, gou mbouj hawj sou haeuj gyawj gizneix, neix dwg dieg gou.”

Nyaenma sienseng naeuz: “Mwngz yaek deng doeg dai.”

“Luenh gangj,” Duznou naeuz, “gou naengh youq baihgwnz yawj de roengz doeg, de ciengxlwenx gaej siengj dangj gou.”

Nyaenma sienseng、duzvanh caeuq duz nyaenma ceiq iq moix duz gag riuj guenq laeuj makbingzgoj ndeu, daj mbiengj ranz lajdieg ndeu deuz coh lingh mbiengj.

“Raen moq, duznou, vih gij laeuj makbingzgoj ndei neix, gyo- mbaiq mwngz!”

Gyoengqde doq okrengz hemq, doq ndonj haeuj aen congh gwnzciengz haenx, mbouj raen ngaeuz lo.

“Caeg!” Duznou hemq naeuz, “Bouxcaeg! Caeggeq! Gaijdiuq!”