Gou bineix gaenq hwnj sam nienzgaep lo. Youq hagdangz, goenggoq gou lohloh cungj ndei raixcaix, youq ranz gou hix naemj saehcingz yienghyiengh gag guh, guh boux vunz gaenxguh ndeu.

Banhaet, gou ngamq hwnq mbonq, daxmeh couh buet gvaqdaeuj bang gou daenj buhvaq. Gou guhmuengz vad fwngz, naeuz：“Daxmeh, saehcingz bonjfaenh gou gag guh, mwngz gaej bang gou daenj buhvaq lo!” Daxmeh naeuz：“Mwngz seizneix cujyau yinvu couhdwg hag, doengh gij saeh neix mwngz mbouj yungh guh!” Gou naeuz：“Daxmeh, duzroeg yaek aeu hag rox gag mbin, danghnaeuz daxmeh itloh baujhoh de, de ciengxlwenx mbouj rox mbin！ Gvaqlaeng gou gag daenj buh、daenj haiz、roi gyaeuj、 swiq naj ba!” Daxmeh angqyangz naeuz：“Lwg gou dauqdaej majhung lo!” Dingq le vah daxmeh, sim gou van lumj gwn dangz nei.

Banhaemh, gou guh cozyez liux le, naemj：Daxboh ngoenznaengz guhhong baeg baenzneix, gvaqlaeng cozyez gou couh gag genjcaz bae, mbouj hawj daxboh sinhoj lo. Gou dawz cozyez hwnjdaeuj genjcaz, baenz di baenz di gaij gij loengca. Daxboh dauqma le baeg yaek dai, lij gaem cek cozyez gou bae genjcaz, caen hawj vunz gamjdoengh ha！ Yienghneix gou guhmuengz buet gvaqbae, vad fwngz naeuz：“Daxboh, cozyez ngoenzneix gou gag genjcaz lo, gvaqlaeng gij saehcingz bonjfaenh gou gag guh, mwngz ngoenznaengz baeg baenzneix, wnggai yietnaiq ndeindei bae.” Daxboh yawj gou, riunyumnyum：“Lwg gou dauqdaej majhung lo, rox gvansim bouxlaux lo！”

Yaek ninz lo, daxdaiq youj bat raemx raeujrubrub ndeu byaij gvaqdaeuj coh gou, naeuz:“Daeuj, daxdaiq bang mwngz swiq ga!” Gou guhmuengz buet gvaqbae, ciep aeu bat raemx ndawfwngz daxdaiq, naeuz：“Daxdaiq, gvaqlaeng saehcingz bonjfaenh gou gag guh, mbouj hawj mwngz bang gou lo! Gvaqlaeng gou hix bang mwngz swiq ga ba!” Daxdaiq dingq le, naj riunyumjnyumj. Lumh gyaeuj gou naeuz：“Caen dwg lwggvai!” Menhmenh, gou hag rox saehcingz bonjfaenh gag bae guh lo.

(sam nienzgaep Hij Dauh)