Mwhnyez gou miz haujlai saeh mizyinx.

Geiq ndaej miz baez ndeu gvaqnienz, gou caeuxcaeux couh hwnq congz, dajswiq ndaej le, gou couh bae ra daeggo caeuq gou bae sou cienzlok. Gou sien bae ra daxheiz hung baiqnienz:“Daxheiz hung goengheij fatcaiz!” Daxheiz hung couh hawj gou aen cienzlok ndeu, gou angq dwk buetdeuz ndoj hai cienzlok, baez yawj cij miz 20 maenz, gou beg angq lo. Seizneix, daxau byaij gvaqdaeuj, de raen gou yupyup yapyap muengh hwnj muengh roengz, couh gangj:“Cilinz, mwngz youq gizneix guh gijmaz?”Gou lienzmuengz yo cienzlok hwnjdaeuj, gangj:“Daxau, goengheij fatcaiz!”Daxau couh hawj gou aen cienzlok ndeu. Gou dajhai baez yawj, gingq- yienz miz 100 maenz, gou angq ndaej mbat diuq sam cik sang.

Gou aeu cienzlok bae gwnzhaw cawx bauq, gou daeuj daengz baihnaj aen diemq gai bauq ndeu, gij bauq ndawdiemq gak cungj gak yiengh, gou yawj ndaej da cungj va liux. Gou genj aeu haj yiengh bauqva, faenbied dwg caencaw rimdieg, bauq lwggyangq, bangh dahsien, bauq cungqraez, caetsing nengzgoemj.

Daengz gyanghwnz 12 diemj, dou daengx ranz vunz cungj daeuj daengz dingjlaeuz cuengq bauq, gou ngiengx gyaeuj muengh gwnzmbwn, gyang- mbwn cungj dwg gij bauqva hoengz- hoengz heuheu, gyaeundei raixcaix, gou sikhaek dawz soujgih okdaeuj ingjsiengq. Ciepdwk, gou hix dawz gij bauqva gou okdaeuj, gou roxnyinh diemj feiz baez aen baez aen menh lai lo, couh dawz gij bauqva baij baenz gien ndeu, dawz diuz bangh dahsien okdaeuj, diemj feiz le yiengq cungq- gyang baez cuengq, bauq lwggyangq aen lienz aen deng diemj dawz, couh lumj lwggyangq nei baenqlulu, miz gij bauqva hoengzhoengz heuheu, raen neix dou cungj riuhaha.

Gvaqnienz sou cienzlok cuengq bauqva, neix dwg gij dauqngeix ceiq- laeg mwhnyez gou, gou ciengxlwenx lumz mbouj bae.

(Sanglinz Yen Dafungh Cin Vangzcouh Siujyoz haj nienzgaep Ciz Cilinz boux lauxsae son’gyauq Lij Haijyen)