（ciep geizgonq）

16 Boux Mehmbwk Haenx

“Vaiq vei.” Nyaenma sienseng naeuz, “Ndoj youq!”

De、duzvanh caeuq duz nyaenma ceiq iq diuq hwnj aen gyaq baij huq ndeu, maeuq youq baihlaeng baiz guenq cang laeuj makbingzgoj ndeu.

Gyoengqde heux gvaq aen guenq ndomq, yawjraen boux mehmbwk hung- hung ndeu daeuj daengz ndawranz lajdieg, mwh byaij daengz mbaek lae ceiq sat, boux mehmbwk haenx ngeizvaeg yaep ndeu, yawjyawj song mbiengj, liuxle de couh cigsoh byaij haeuj giz nyaenma sienseng、duzvanh caeuqlienz duz nyaenma ceiq iq ndoj youq haenx, de couh youq baihnaj gyoengqde dingz roengzdaeuj, de caeuq gyoengqde dandan gek baiz guenq laeuj makbingzgoj ndeu! De liz gyoengqde baenzneix gyawj, neix hawj nyaenma sienseng dingqnyi de diemheiq. De daj geh guenq caeuq guenq, laeglemx yawj, raen ndawfwngz de gaem diuz faex laenh mba hung ndeu.

“Bijwnh fuhyinz, de baez neix siengj aeu geijlai?” Boux mehmbwk haenx hemq naeuz.

Liuxle daj dingj lae cienz daeuj aen sing wnq: “Aeu daeuj song sam guenq.”

“De ngoenzlwenz ndoet gvaq seiq guenq, Bijwnh fuhyinz.”

“Dwg lo, hoeng de ngoenzneix aeu mbouj ndaej baenzlai, aenvih de youq baihgwnz youq mbouj geijlai nanz lo. De naeuz, duz nyaenma haenx ngoenzneix haetromh itdingh yaek deuz okdaeuj, de mbouj gojnaengz youq ndawcongh iek ngoenz dem lo.”

Boux mehmbwk ndawranz lajdieg iet fwngz daj gwnzgyaq aeu guenq laeuj makbingzgoj ndeu bae, guenq de aeu haenx caeuq giz nyaenma sienseng ndoj youq haenx dan gek aen guenq ndeu.

“Danghnaeuz gaj dai duz cukseng dwgcaengz haenx hoij youq lajroq, gou couh vuenheij lo.” De okrengz naeuz, “swnhbienh gangj, Bijwnh fuhyinz, gvan mwngz dapwngq gvaq, aeu diuz rieng dang huq geiqniemh soengq hawj gou.”

“Diuz rieng haenx gaenq deng dwg vaih lo.” Aen sing baihgwnz gangj, “mwngz caengz rox ha?”

“Mwngz dwg naeuz diuz rieng haenx vaih le?”

“Dang’yienz deng vaih lo. Gyoengqde nyingz deng diuz rieng haenx, hoeng nyingz mbouj deng duz nyaenma haenx.”

“Ya, caen dwg raen fangz!” Boux mehmbwk hunghung haenx naeuz, “gou lij dwg gig siengj aeu diuz rieng haenx bw.”

“Meizboh’wz, mwngz aeu aen gyaeuj haenx vuenh diuz rieng goj ndaej ne. Mwngz hawj vunz aeu de cang roengz bingz bae fung hwnj, hoij youq gwnzciengz ndawrug mwngz. Seizneix aeu laeuj makbingzgoj hwnjdaeuj vaiq di vei.”