“Cij gvaiq gou mingh hoj lai, guh bawx, haq ndaej geij bi, gyagoeng gyabuz caeuq bouxgvan gonqlaeng dai lo, dan lw miz lwgdog ndeu buenx gou, seizneix lij deng ngwzdoeg haeb. Mwngz mbouj yawj gij naj bouxlix, hix aeu yawj gij cingzeiq bouxdai, gyoengqde daiq mwngz gig ndei, mwngz lij caeuq bouxgvan gou doxcaemz gvaq le. Gou mbouj goq maz mingzsing daeuj gouz mwngz hawj di ywdoj, aen sim mwngz dwg gaiqdiet roxnaeuz ndaekrin lwi?”

Miz gij sing daejsipsip daj ndawranz cienz okdaeuj, ndaeng gou hix miz di soemj, liuh mbouj daengz boux vunz ndawde gingqyienz dwg Simjmehveij, de couhdwg Siu Cuh, boux dahsau gij goj Aulungzgveiz gangj haenx! Gou mbouj saenq geijlai ha!

“Gou youh mbouj dwg canghyw, vihmaz mbouj soengq haeuj ndawsingz bae?” Aulungzgveiz daihbueg dap.

“Lwgfwngz gig foeg, byaij daengz ndawsingz lij aeu buenq ngoenz, lauheiq ganj mbouj gib ra canghyw lo.”

“Mwngz mbouj dwg gig rox sup lweddoeg ha? Sup lweddoeg okdaeuj gonq!”

“Mwngz gaej gangj vahcoeg, hw, Lungz Byauh, mwngz caen mbouj dwg vunz!” Simjmehveij gangj yak, ciepdwk ndaejnyi gij sing yamqdin, de daj ndawranz cung okdaeuj, gyaeuj hix mbouj baenq doxdauq buet bae coh naj miuh.

Gou nyengh lo, ing youq faj- ciengz, baez he hix mbouj gamj ning.

Seizneix, gou hainduj roxnyinh Aulungzgveiz gig haenqsim lo, vuenh dwg saek boux vunz, cungj mbouj lumj de yienghneix saej geng mbouj sij ndaej gouq, yienznaeuz de haemz Simjmehveij, hix dwgcaengz Ahveij, hoeng, seizneix Ahveij deng ngwzdoeg haeb, de cungj mbouj haengj bang- fwngz hawj di ywdoj, baenzlawz hix gangj mbouj ndaej bae, engq mbouj aeu gangj Simjmehveij baenzneix roengznaj daeuh de lo!

(caengz sat)