Bauqrengh coux bimoq,

Bwh ndei huq gvaqcieng,

Lajbiengz gyoengq hauxseng,

Cungj dwg ceng hauqswnh.

Gou nyaengq mbouj maranz,

Lij hwnjban seizneix,

Haemhnaengz ninz youq ngeix,

Bohmeh ndaej yiet caengz.

Ngoenz cieng yaek daeuj daengz,

Gou gyanghwnz gag ngeix,

Bohmeh mbouj yungzheih,

Saeh youheiq miz lai.

You gou maj mbouj hung,

Lau byaij loeng diuzloh,

Baenz ciuh cungj souhhoj,

Youh mbouj doj(naeuz) vunz rox.

Geiq ndaej gou nyaeq seiz,

Bohmeh ciengzseiz son,

Lai coh baihnaj ngonz,

Fuengzre loenq roengz loemq.

Naeuz saw miz ranz gim,

Aeu haeujsim lai yawj,

Haengjdingh miz ndeicawq,

Aeu guh cawj seizgan.

Bohmeh ciengx gou hung,

Mbouj ndaej soeng saekseiz,

Daengngoenz ndat lumj feiz,

Ciuqyiengh bae cauh ngaenz.

Fwn roengz hix bae hong,

Mbouj ndaej soeng saekseiz,

Ndaej guhhong couh ndei,

Ra seizgei cauh ngaenz.

Guh naz youh guh reih,

Lij guh seng’eiq dem,

Caenh ngeix dawz ngaenz dem,

Cij miz yiemz hong noix.

Seizneix bohmeh laux,

Vanzlij cauh ngaenz dem,

Goengrengz bibi gemj,

Caih lawz hemq mbouj coengz.

Gij cingz naek lumj bya,

Gag ngeix raemxda doek,

Danghnaeuz bae ragoek,

Lumj cax yoek simyin.

Seizneix gvaq bi he,

Nyienh bohmeh sim’angq,

Ndangdaej ngoenzngoenz cangq,

Gvaq angqyangz ndwenngoenz.

Caj gou ndaejhoengq seiz,

Ndeindei buenx gangjgoj

Hix mbouj dwg gangjboq,

Dingh aeu coh angqyangz.

Binghraq caengz mied caez,

Geiq doengzcaez fuengzre,

Ndangdaej cangqcwt he,

Hix aeu re cij ndaej.

Nyienh bohmeh ndangcangq,

Caeuq doih angq guhcaemz,

Ngoenzngoenz angq daengz haemh,

Beij gwn caem lai dij.

Youq diegrog gwndaenj,

Bohmeh aen nanz bauq,

Seizneix bohmeh laux,

Gou lawz bauq ndaej caez?

Nyienh bohmeh naihsouh,

Lai yiengjsouh fukheiq,

Vut caez gij youheiq,

Gvaq vuenheij ndwenngoenz.