Youq ndaw daihhag, gij cingzcik goq dijyuz ndei mbouj ndei nanangq daengz ndaej mbouj ndaej ciengjyozginh、miz mbouj miz swhgwz ndaej baujsoengq doeg yenzgiuswngh. Ndigah, gyoengq daihhagseng bouxboux cungj gig yawj- naek goq dijyuz.

Aen haggeiz neix, gou senj hag dwk baizgiuz. Gaxgonq, gou mbouj ndaej dwk baizgiuz gvaq, caen mbouj rox dwk baizgiuz dwg gienh saeh hoj guh ndeu. Dwk baizgiuz miz yiengh goengfou ndeu heuhguh “demh giuz”, couhdwg baeuh aen baizgiuz hwnjdaeuj sangsang le, caj aen de doek roengzdaeuj song fwngz gop guhdoih ngenggengz bae dangj, hawj aen giuz danz hwnjdaeuj, baez doek youh dangj, yienghneix laebdaeb mbouj dingz bae dwk. Gangj dwg genjdanh, baez guh couh hoj lai lo. Gou ngamq hainduj hag cungj deng aen giuz dwk deng fajfwngz roxnaeuz fajnaj, gvaqlaeng song fwngz youh naet youh get. Hoeng, aen haggeiz neix dwg gauj “demh giuz”, dwk samcib aen ndaej gibgek, hajcib aen ndaej faen rim.

Aen haggeiz neix gvaqdaeuj, hag- dangz cungj dwg guhhong coih giuz- cangz, dou mbouj ndaej hwnj geijlai dangz goq dijyuz. Gou hix mbouj miz geijlai seizgan lienh “demh giuz”, caj daengz lauxsae sawqmwh senhbu daez- gonq gaujsi, gou cungj doeksaet liux.

“Cungh Yuzsiu,” Lauxsae heuh gou naeuz, “daengz mwngz lo.”

Gou ndawsim diuqbubbub, byaij daengz baihnaj lauxsae. Gou caenhliengh cangguh yiengh simdingh, vit aen giuz hwnjbae,“it, ngeih, sam……cib, cib’it!” Aen giuz doek roengz gwnznamh bae lo, gou ngamq dwk ndaej cib’it aen ndwi! Mbouj habgek! Gou hojgvaq dangqmaz, daengx ndang cungj naiqnueknuek liux.

“Doengh boux gauj mbouj ndaej habgek de, lij ndaej bouj gauj.” Lauxsae fat siusik youq ndaw ginzveihsin. Gou lumj mbwn rengx raen daengz fwn yaek doek nei, yawjraen maqmuengh lo.

Aen haggeiz neix mbouj miz geijlai ngoenz lo, vihliux ndaej gauj gvaq “demh giuz”, gou couh coh dijyuz veijyenz ciq aeu aen baizgiuz ma gag lienh.

Gyangngoenz mbouj miz seizgan, gou cij ndaej doengxhaemh bae gwnz cauhcangz lienh dwk giuz. Seizdoeng Baekging, banhaemh cungj dwg song doh daengz bet doh ndaw neix, lij miz rumznit dem, doengxngoenz hix mbouj raen miz maz vunz okdaeuj lienhndang. Gou cix haemhhaemh gag dawz giuz youq ndaw rumzbaek nitsisi lienh dwk. “It、ngeih、sam……” Doengx ban doengzhag cungj ndaej habgek lo, dan gou caengz ndaej, gou haeb heuj gag mieng, mboujguenj baenzlawz yiengh, itdingh aeu gauj gvaq.

Daengz ngoenz boujgauj lo. “Laux- sae, gou daeuj gaujsi.” Gou saenqsim cibcuk, mbeifag coh lauxsae naeuz, “hawj gou gauj gonq ba.” Lauxsae raen gou baenzneix naeuz couh doengzeiq lo. “It、ngeih、sam……caetcib sam、caetcib seiq、caetcib haj!” Gou habgek lo! Gou sim’angq raixcaix.

Hwnj daihhag le, gou miz haujlai mbouj gvenq. Daihhag caeuq gauhcungh miz haujlai mbouj doxdoengz. Youq gauhcungh, dwg lauxsae son mwngz, coi mwngz bae hag. Hoeng youq ndaw daihhag lauxsae cix mboujguenj mwngz baenzlai, mwngz aeu cawjdoengh bae gag hag. Neix hix dwg boux vunz menhmenh bienqbaenz gij yiengh roxsoq luba.