Gou yaek gaisau boux baengzyoux neix singq Ciz, dou heuh de daeggo Ciz. De sang mij caet baedauq, suyoz cingzcik ndei raixcaix, yijvwnz cingzcik cij haemq yaez. De ceiq gyaez dwk lanzgiuz, mwh hwnj dangz dijyuz, ciengzseiz heuh vunz faen doih dwk lanzgiuz, ndek giuz cinj raixcaix, doih de ciengzseiz dwk ndaej hingz. Geiq ndaej miz baez ndeu, aen doih de yaek saw doiqfueng faen ndeu, de baengh bonjfaenh, youq diuzsienq sam faen yungh rengz baez ndek, ndek deng ndaej faen, giuzcangz nauhyied raixcaix, aen doih gyoengqde doeklaeng ndaej hingz song faen.

Mboujgvaq bouxak hix miz saetloeng. Lumjbaenz miz baez ndeu gyoengqde caeuq 3 ban doxdax, mwh daeggo Ciz dop giuz, doiqfueng daj song henz gap de, de yaek cienz giuz hawj bouxdoih, sawqmwh mbouj siujsim giuz doek lo. Doiqfueng dawz cinj seiz, guhmuengz ciengj giuz gvaqbae. Cigsoh cienz hawj bouxdoih, baez cienq ndang youh cienz hawj bouxwnq, mbouj hawj daeggo Ciz ciengj ndaej. Mwh boux haenx yaek ndek gien, daeggo Ciz dangj youq baihnaj, boux haenx yaek dop giuz gvaq baihlaeng bae, cix deng bouxdoih daeggo Ciz ciengj ndaej giuz lo, caemhcaiq cienz giuz hawj daeggo Ciz, daeggo Ciz ok rog diuzsienq sam faen, lij naemj ndek sam faen. De liuqcinj, yungh rengz baez ndek, hojsik lai ndek mbouj deng, giuz daemj daengz lanzbanj youh biu dauqma. Caezgya doeknaiq dangqmaz, cungj naeuz boux- doih.

Mboujgvaq daeggo Ciz mbouj doeknaiq, dauqfanj yied dwk yied ak. Doxdax laebdaeb dwk, giuz youq gyang- fwngz gyoengqde dop bae dop dauq, raemxhanh saj daengz najdieg suijniz, ndawhag sing hemqheuh goksasa.

Mwhneix, seizgan ngamq lw cib faen cung, daengz doiqfueng hai giuz lo, gyoengqde yungh vaiqgung cansuz, mboujduenh gung. Daeggo Ciz lijdwg laebdaeb roengzrengz, doiqfueng itcig bae gap de, yienhciengz nauhyied raixcaix. Daengz daeggo Ciz hai giuz, de hai giuz hawj bouxdoih gonq, doiqfueng naemj ciengj giuz bae, bouxdoih de youh cienz giuz dauq hawj daeggo Ciz. Daeggo Ciz baez bibuengq, doiqfueng laihnaeuz de yaek gung, guhmuengz bae gap baihnaj de, naemj mbouj daengz daeggo Ciz sikhaek doiqlaeng, yienz- haeuh gengz ndang daj henzgyawj gvaqbae. Bouxdoih doiqfueng guh- muengz gvaqdaeuj gap, gaenj mbouj gip, de sam yamq hwnj lanz, giuz ndek deng gien. Ginggvaq ciengz doxdax neix, dou engq boiqfug de lo.

(Gveigangj Si Gangjbwz Gih Hozcwngz Siujyoz roek nienzgaep Vangz Lozmingz)