Vahgangj baezgonq duzgvi duzdoq doxdax buet, duzdoq buet ndaej gig vaiq, bonjlaiz buet ndaej hingz, ndaej dawz gimbaiz, hoeng duzdoq byongh loh ninz ndaek, duzgvi couh hingz lo. Dajhaenx le duzdoq bae daengz gizlawz, cungj deng vunz riu, lienz duzsaehaexma hix riu de, duzdoq roxnyinh mbouj miznaj, couh bae ra duzgvi, caiq beij baez ndeu.

Doxdax hainduj lo, duzdoq lumj naq nei mbin bae, de doq buet doq ngeix: Baez neix gou itdingh mbouj ndaej ninz ndaek lo, gou aeu itcig buet daengz dieg aeu daih’it, ra dauq aennaj gou. Yienghneix naemj dwk, de buet ndaej engq vaiq lo, yaep ndeu couh mbouj raen aenngaeuz lo.

Duzgvi ne? De menhmenh ruenz bae, ruenz le gig nanz cij ruenz ndaej duenh loh dinj ndeu, mboujgvaq de itcig ruenz mboujdingz gvaq.

Caiqgangj duzdoq itcig buekmingh buet dwk, da raen couh yaek daengz dieg! Sawqmwh bungz- daengz diuzdah ndeu, ndawdah raemx lae haenq raixcaix, laeg raixcaix, youh mbouj miz giuz, baenzlawz guh ne? Duzdoq mboujguenj samcaet ngeihcib it, yungh rengz diuq gvaqbae, hoeng, diuq mbouj gvaqbae, lij “bungh” sing ndeu doekroengz ndawdah bae lo, raemx laeg lai， duzdoq hwnjdaeuj mbouj ndaej, deng raemx cung daengz gizgyae bae lo.

Duzgvi itcig ruenz ha ruenz bungqdaengz diuzloh roengzbo, duzgvi gig haisim, de dawz gyaeuj baez suk, sikhaek ringx daengz henz dah’iq. Seizhaenx, duzgvi dingqnyi duzdoq swenj gouq- mingh, duzgvi siengj cungj mbouj siengj, couh diuq daengz ndawdah bae lo, youz daengz henzndang duzdoq, dawz duzdoq doz hwnj gwnzhamq. Duzdoq ndawsim gig gamjdoengh, naeuz:“Docih duzgvi gouq gou, mwngz hingz lo, mwngz bang vunz guh’angq, mwngz dwg caen ndaej hingz lo.”Duzgvi riu lo，duzdoq hix riu lo, gyoengqde couh itheij baema ranz lo.

(Sanglinz Yen Dafungh Cin Cunghsinh Siujyoz Cinz Cihsan boux lauxsae son’gyauq Mungz Cwngzgen)