（ciep geizgonq）

“Gwn ndaej doh lai lo!” Nyaenma sienseng gangj caengz sat, ciengj aen guenq gvaqdaeuj, aeu haeuj henzbak, ndoet gaemz hung ndeu.

“Caen ndei lai lo!” De doq gwnrengz diemcaw, doq laeglemx naeuz, “siengj mbouj daengz, baenzgwn lai lo!”

“Daengz gou lo.” Duzvanh gangj sat, ciep aen guenq gvaqdaeuj, aen gyaeuj ngiengx gvaq baihlaeng, laeuj makbingzgoj gulu gulu lae roengz conghhoz de bae.

“Couh lumj……couh lumj gim cieg,” de diemcaw naeuz, “wn, beix nyaenma, neix couh lumj……, couh lumj ndoet ndit caeuq duzdoengz bw……”

“Sou caeg ndoet laeuj!” Duznou swenj naeuz, “sikhaek cuengq roengzdaeuj, sou ndoet yaek liux lo.”

Duznou ndoj youq gwnz aen gyaq ceiq sang ndaw deihgoengq laeuj, youq baihlaeng aen guenq hung ndeu ndomq baihrog, miz diuz guenj gau iq ndeu cap youq ndawbak guenq, duznou cingq yungh diuz guenj neix ndoet laeuj ne!

“Mwngz ndoet fiz lo!” Nyaenma sienseng naeuz.

“Gaej guenj saeh bouxwnq!” Duznou hemq naeuz, “Sou gyoengq hukhak hung fwngz huk ga huk neix, danghnaeuz daeuj gizneix loengh ndaej luenhhuhu, raeuz cungj yaek ngaiz gaeb. Okbae! Hawj gou youq gizneix dinghdingh ndoet di laeuj makbingzgoj!”

Couh youq mwh neix, gyoengqde dingqnyi ndawranz baihgwnz boux mehmbwk ndeu hemq naeuz:

“Meizboh’wz, vaiq bae aeu laeuj makbingzgoj daeuj.”

De laebdaeb hemq naeuz: “Mwngz rox Bijwnh sienseng mbouj maij caj mbouj liux saek baez, daegbied dwg youq mwh de youq ndawbungz guh baenzhwnz gvaqlaeng.”

Gyoengq doenghduz doeksaetyat, gyoengqde dingz youq mbouj doengh saekdi, daengj rwz hwnj, aenndang gyaengj liux. Gaenlaeng gyoengqde dingqnyi gij sing aendou deng hai ok, aen dou haenx youq giz ceiq dingj duenh laerin daj aenranz baihgwnz doeng roengz ranz lajdieg haenx.

Seizneix, miz vunz hainduj byaij haeuj henz gaeqhojgih!