Gwnzroen byaij bae banrogdangz, sawqmwh miz ndik raemx ndeu ndik daengz gyaeuj gou, gou laihnaeuz dwg doek fwn lo, daengzlaeng cix raen miz ronghgim youq baihnaj gou……

Mwh gou singj gvaqdaeuj, gou doeksaet yat, yienzlaiz gou ninz youq baihgwnz duj fwjhau ndeu, henzgou miz boux lwgnyez daenj buhvaq ciuhgeq ndeu, fwngz de gaem gonj bit hungloet ndeu, ganjbit ndaemndat, bakbit migmyanzmyanz, de yawjraen gou couh riuhehe, doiq gou naeuz：“Doiq mbouj gvaq, siujbaengzyoux, gou heuh Maj Liengz, haxbaenh gou cingq vehveh mbouj siujsim saj ndik raemxmaeg ndeu, ndik deng mwngz lo, gou nyienh’eiq aeu gonjbit gou ciq hawj mwngz, buenx mwngz gvaq ngoenz angqyangz ndeu.”

Maj Liengz cam gou naemj bae dieg lawz, gou dangyienz dwg naemj bae youz gak dieg. Dou naengh dujfwj mbin youq gwnzmbwn, caen mizyinx ha：Baihlaj dwg bya、dah、haij, yaepyet dou couh hamj gvaq doeng sae namz baek, caen naemj mbouj daengz ha！

Dou bae daengz diegbya hojndoq baihsae, Maj Liengz ciq gonj bitsaenz hawj gou, gou yungh bitsaenz hwnq aen ranz moqsag ndeu hawj gyoengq lwgnyez gizhaenx. Raen gyoengq lwgnyez naj riunyumnyum, gou caeuq Maj Liengz hix riu lo; dou bae daengz hawsingz hung, raen aen conghheuq sangngau baihgwnz gunghcangj, baizcuengq hoenz ndaemndatndat, yienghneix gou aeu bit okdaeuj baez veh, veh le aen “gihcienjvuenh heiqfeiq” hungloet ndeu. Mwh aen gihgi neix rox miz heiqfeiq baizcuengq okdaeuj, couh sikhaek ndoet heiqfeiq haeujbae, hawj heiqfeiq bienq seuqcengh, baizcuengq okdaeuj couhdwg heiqyangj seuqcengh. Seizneix, Maj Liengz nyaenx mbouj ndaej daengj lwgfwngzmeh haenh gou.

Ngoenz seizgan ndeu gvaq ndaej riengjret, neix caen dwg ngoenz saenzgeiz caemhcaiq miz yiyi ndeu.(seiq nienzgaep Cinz Gihih)