（ciep geizgonq）

15 Aen Deihgoengq Laeuj Makbingzgoj Baexmaed Bijwnh

Nyaenma sienseng sijsaeq saemj- yawj faj ciengz neix baez ndeu, de yawjraen gij suijniz ndaw geh cien gaenq gaeuqged caemhcaiq soiqdek lo, ndigah de mbouj yungh geijlai rengz, couh hawj gep cien ndeu doengh lo, caemhcaiq dawz de okdaeuj.

Sawqmwh, daj ndaw aen congh gep cien aeu okdaeuj cauhbaenz haenx, “hux” baez ndeu conh ok faj naj iq youh siemj youh maj miz mumh ndeu, caemhcaiq cienz daeuj sing gangjvah hujdengdeng.

“Gvaq mbiengj bae, sou mbouj ndaej daeuj gizneix! Neix dwg giz deihbuenz gou!”

“Dai lo!” Duzvanh naeuz, “dwg nou.”

“Mwngz duz cukseng moegdoeg neix,” Nyaenma sienseng gangj naeuz, “gou wnggai cai daengz yaek youq baihlaj neix gizlawz raen mwngz.”

“Gvaq mbiengj bae,” Duznou swenj naeuz, “neix dwg giz gou, dwg gou daeuj gizneix gonq.”

Nyaenma sienseng naj riunyum- nyum, gij heuj hausagsag de ndongq- myanzmyanz.

“Duznou ndei,” De unqswnh naeuz, “gou dwg duz iek yaek dai, danghnaeuz mwngz mbouj deuz vaiq di, gou yaek gaemz ndeu ndwnj mwngz roengz hoz.”

Gij vah neix miz cozyung lo, duznou “biux” sing ndeu baenq ndang couh deuz, mbouj raen riz lo.

Nyaenma sienseng riuhaha, caemhcaiq daj gwnzciengz aeu ok engq lai cien, daengz mbon ok aen congh loq hung ndeu, de ndonj haeuj congh bae. Duzvanh caeuq duz nyaenma ceiq iq haenx goj gaen youq baihlaeng de, ndonj haeujbae lo. Gyoengqde raen bonjfaenh daeuj- daengz ndaw aen deihgoengq hung- gvangq youh cumx youh ndaem ndeu.

“Cingq dwg de!” Nyaenma sien- seng okrengz gangj.

“Neix dwg gijmaz?” Duzvanh naeuz, “gizneix gijmaz cungj mbouj miz ni.”

“Gaeqhojgih youq gizlawz?” Duz nyaenma ceiq iq haenx yawj giz ndaem naeuz, “gou siengj Bijwnh dwg boux ciengx gaeqhojgih bw!”

“De dwg boux ciengx gaeq- hojgih!” Nyaenma sienseng naeuz, “Hoeng seizneix raeuz mbouj dwg daeuj ra gaeqhojgih, raeuz gaenq miz haujlai gijgwn lo!”