Youq ranz daxdaiq gwnzbo miz benq diegnywj gvangqlang1ang yawj mbouj raen haenz、heufwdfwd ndeu, neix couhdwg dieg guhcaemz gou.

Seizcin daeuj lo, rumzcin menh- menh ci dwk, ndit raeujrubrub, roeglwg youq gwnz gofaex ciengqgo, lumjnaeuz cingq gangj: “Nywj iq mwngz vaiqdi hwnjdaeuj ba!”Nywj iq dingq le couh daj lajnamh conh okdaeuj, gig oiq gig heu youh gig singjsien, hawj vunz yawj le gig cwxcaih. Haujlai vunz daeuj gizneix cuengq yiuhrumz、dik cuzgiuz、 dwk lanzgiuz、gangq doxgaiq……Gwnz diegnywj dauqcawq dwg sing riu, nauhyied dangqmaz. Gou caeuq gobiuj ciengzseiz daeuj gizneix dwk yijmauzgiuz, mwngz doi gou dangj, haisim raixcaix. Mizseiz gou hix caeuq daxmeh gou itheij bae diegnywj cuengq yiuhrumz, gou cuengq le aen yiuhrumz duzmbaj, gou doq rag diuz cag doq hemq dwk:“A! Yiuhrumz yaek mbin daengz ndawfwj bae lo.” Youq gwnz diegnywj guhcaemz caen haisim ha!

Seizhah daengz lo, go’nywj iq maj ndaej youh sang youh heu, caij hwnj bae couh lumj caij youq gwnz deihdamj unqnem nei. Gwnzdieg majok gij dujva ronghsien, yinx duzrwi caeuq mbungqmbaj daeuj aeu dangz. Duzcwz caeuq duzvaiz cingq gwn nywj, gyoengqde itmienh ngaem gyaeuj gwn nywj itmienh bi diuz- rieng, gyoengqde itdingh gwn ndaej gig van ne. Seizhaenx gou caeuq gobiuj doxgyaep、guhcaemz、dwkgiuz, ciengzciengz loengh ndaej gwnz- gyaeuj hanhswdswd, gig miz yinx- daeuz.

Geiqciet coudoeng, mbwn bienq nit lo, gij nywj gwnz diegnywj hix bienq henj lo, bienq roz lo, bienq geq lo. Seizhaenx gyoengq vunz sam boux baenz bang, song boux guhdoih daeuj gizneix youzbyaij, hix miz vunz daeuj gizneix gangq doxgaiq gwn. Gou caeuq gobiuj、daxdaiq……hix daeuj youz- byaij, gyoengqdou miz gangj miz riu caen vaiqvued.

Diegnywj dwg aen dieg guh- caemz gou, daiq haujlai angqyangz daeuj hawj gou, gou gyaez aen dieg guhcaemz gou.

(Sanglinz Yen Dafungh Cin Cungsim Hagdangz seiq nienzgaep Cinz Cihsan boux lauxsae son- gyauq Mungz Cwngzgen)