Dangzgaghag, lauxsae daiq dou roengz lajlaeuz bae guhcaemz “song vunz sam ga buet”.

Gou caeuq Lij Cwnz guh cuj ndeu. Vihliux ndaej hingz, dou leihyungh seizgan ciengz doxdax daih’it daeuj lienh buet.

Gou ra daeuj diuz cag ndeu, itmienh dawz ga swix gou caeuq ga gvaz Lij Cwnz cug doxcaez, itmienh naeuz: “Lij Cwnz, mwngz yaek ndeindei boiqhab gou bw! Yienghneix cij ndaej hingz.”

“Ndei, gou itdingh ndeindei boiqhab mwngz.” Lij Cwnz saenqsim cibcuk dwk naeuz.

Song boux dou menhmenh byaij, byawz rox yamq daih’it couh ceng di deng laemx, aenvih gou ok ga mbouj cug haenx, Lij Cwnz cix ok ga deng cug haenx.

“Lij Cwnz ok ga mbouj cug gonq, caiq ok ga deng cug, rox lwi?”

“Rox lo, raeuz hainduj ba.”

Dou youh laebdaeb lienh byaij, baez- neix mbouj deng laemx lo. Song boux dou doxcaez heuh “it ngeih it ngeih” daeuj hawj dou engq dawzbanj. Dou gyavaiq yamqdin, byaij yied daeuj yied vaiq, doeklaeng gingqyienz buet ndaej lo. Song boux dou lienh sug le dungcoz, boiqhab dawzbanj, gyahaeuj ciengz doxdax daihngeih.

Daihgya cungj vudgen vudga, simgaenj yaek sawq.

“Cunjbei, buet!” Lauxsae sing hung hemq.

Daihgya yamq ga couh buet, gou caeuq Lij Cwnz hix vaiqvet buet bae coh baihnaj, haemq vaiq couh mauhgvaq cuj daihngeih, youh mauhgvaq cuj daihsam.

“Gyayouz! Gyayouz! Daihgya gyayouz!”

Gig vaiq, miz cuj he gyaep hwnjdaeuj lo, gou cungj roxnyinh daengz raeblaeng miz vunz ajngaeb.

Gou doiq Lij Cwnz naeuz: “Gyayouz, raeuz cunjbei yungh rengz cung daengz byai!”

Lij Cwnz yungh rengz ngaekngaek gyaeuj.

Dou vaiqvet buet bae naj fofo, sikhaek couh daengz giz satbyai lo, gou caeuq Lij Cwnz baez yat, yat gvaq diuzsienq satbyai lo.

Daihgya cungj gvaqdaeuj hoh dou ndaej daih’it, seizneix gou caeuq Lij Cwnz gaenq naiqnueknuek lo.

Baez guhcaemz neix sawj gou rox aen dauhleix ndeu: Mboujguenj guh gijmaz saeh cungj hag rox caeuq vunz dox boiqhab, yienghneix cijndaej dabdaengz giz yaek siengj bae daengz haenx.

(Ganhsuz Swngj Canghgyaconh Yen Sinhgen Siujyoz Swh Wnhcwz)