《Baihnaj Daemdengj Mbouj Ngaem Gyaeuj》 bonj saw neix miz bien faenzcieng ndeu heuh 《Gungq- lungz Caeuq Baeuciqyouq》, gou doeg le naemj daengz haujlai.

Youq ndawhaij laegngau’ngau haenx, gungqlungz caeuq baeuciqyouq dwg baengzyoux ndei, baeuciqyouq yawjraen gungqlungz siengj daj ndaw- gyap swhgeij ndonj okdaeuj, laihnaeuz baengzyoux swhgeij siengj mbouj hai, couh gienq de. Gungqlungz mbouj gangj gijmaz, cigdaengz de daj ndaw- gyap ndonj okdaeuj le, cix caemdingh dwk hoizdap:“Dou moix baez majhung cungj dwg sien duet gyap gaeuq, cij ndaej majok gij gyap engq ndongj daeuj, seizneix mienhdoiq yungyiemj, couhdwg vihliux daengzcog engq ancienz.” Baeuciqyouq dingq le lumj- baenz naemj daengz maz. Caez youq ndawhaij ragwn, swhgeij daengx- ngoenz cix dwg nyaengq dwk ra dieg ndoj, coengzlaiz mbouj siengj gvaq guhlawz hawj swhgeij bienq ak.

Bien faenzcieng neix hawj gou rox daengz: Gaej cungj siengj ndoj- deuz, raeuz wnggai mbeilaux bae mienhdoiq sojmiz hojnanz. Cijmiz ginggvaq hojnanz muzlienh baez dem baez, raeuz cijnaengz bienq ndaej yied daeuj yied ak, cijnaengz engq ndei mienhdoiq deuqnyex baezlaeng. Danghnaeuz dan lumj baeuciqyouq ityiengh cungj siengj ndojdeuz, mbouj hawj swhgeij bienq ndaej engq ak, cungj dwg yousim gvaq ngoenz. Miz gawq vah mizmingz naeuz:“Gaej vih caijsoq ndei couh swhgeij fungsaek, gaej vih cainanh couh doeknaiq nueknuek. Caen dwg bouxak, couh aeu daj mwh guh ndaej swnh rox hojnanz, daj mwh guh mbouj swnh ra ronghsag, seizseiz doiqcinj gij muzbyauh swhgeij.” Gawq vah neix dwg Yi Buzswngh gangj.

Gwnzloh buekguh cungj dwg bungz daengz haujlai hojnanz, dangh- naeuz mwngz cungj ndojdeuz, couh bienq baenz mbangj de; danghnaeuz mwngz byaij daengz lajndit, lajdin couhdwg diuzloh gvangqlangh. Mwngz youq mwh majhung engq wnggai miz maqmuengh, miz gyaez, diemjrongh gyaez, cienzndenq gyaez. Raeuz aeu mbeilaux mienhdoiq hojnanz, gaej baez nyangz daengz hojnanz, couh siengj banhfap ndojdeuz. Seizneix, mwngz wnggai siengj banhfap mienh- doiq hojnanz, hoenx hingz hojnanz, cijmiz mwngz hoenx hingz hojnanz baezneix, mienhdoiq hojnanz baez- laeng mwngz cijnaengz guh ndaej engq ndei. Mwngz couh ciemhciemh yawjraen, swhgeij hix bienq ak haujlai, mbouj caiq lumj gaxgonq, baez bungz daengz hojnanz couh ndojdeuz, cungj mbouj siengj mienh- doiq. Ciuh vunz raeuz aeu mbeilaux, hoenx hingz sojmiz, mboujnex mbouj- miz yiyi.

Bien faenzcieng neix lwnh raeuz, bungz daengz hojnanz mbouj ndaej ndupdauq, aeu mbeilaux baenaj, bae ra giz ronghsag, swnh gij ronghsag, deuz ok giz laepngau.

(Sanglinz Yen Dafungh Cin Vangzcouh Siujyoz haj nienzgaep Moz Yenz boux lauxsae son’gyauq Lij Haijyen)