（ciep geizgonq）

Nyaenma sienseng naeuz: “Bozgizswh、Banghswh caeuq Bijwnh cingq youq baihrog caj youq gaj raeuz, gou saenq mwngz rox giz neix.”

“Gou rox, gou rox caen.” Duzvanh simsaeq unqswnh naeuz.

“Hoeng raeuz mbouj dwg yaek vaih daengz lumj gyoengqde yienghhaenx, goj mbouj dwg siengj gaj dai gyoengqde.”

“Gou caen mbouj maqmuengh yienghhaenx.” Duz- vanh naeuz.

“Raeuz fangzhwnz goj mbouj siengj gvaq yiengh- haenx.” Nyaenma sienseng naeuz, “raeuz dan dwg daj gizneix gizhaenx aeu di gijgwn ndeu, yienghneix hawj raeuz caeuq daengx ranz raeuz lix roengzbae, deng mbouj?”

“Gou siengj raeuz dwg deng bik mbouj ndaej mbouj guh.” Duzvanh naeuz.

“Danghnaeuz gyoengqde siengj yienghhaenx doegsieb, baenzneix couh caih gyoengqde siengj lo.” Nyaenma sienseng naeuz, “raeuz youq lajneix dwg duz daihngeih maij soeng’yungz huzbingz.”

Duzvanh gengz gyaeuj gvaq mbiengj ndeu bae, “beix nyaenma, gou maij mwngz.”

“Gyo’mbaiq!” Nyaenma sienseng naeuz, “baenzneix raeuz seizneix laebdaeb vat roengzbae.”

Haj faencung gvaqlaeng, aen nyauj naj duzvanh bungqdaengz cungj doxgaiq geng bingzbingz ndeu.

“Neix dauqdaej dwg gijmaz?” De naeuz, “yawj hwnjbae lumj bangxciengz rin geng.”

De caeuq nyaenma sienseng vat namh gvaq mbiengj ndeu bae, haenx dwg faj ciengz ndeu, yungh cien caep baenz, mbouj dwg yungh rin, faj ciengz neix couh youq baihnaj gyoengqde cingqcingq, lanz gyoengqde dwk.

“Dauqdaej dwg bouxlawz youq lajnamh caep faj ciengz ndeu ni?” Duzvanh cam.

“Ngaih lai lo.” Nyaenma sienseng naeuz, “neix dwg faj ciengz ranz lajnamh ndeu, danghnaeuz gou guj ndaej deng, de couhdwg gij doxgaiq gou ra.”