Bouxboux youq mwh majhung cungj miz gij saehyinx mwhnyez swhgeij, seiz lij iq dwg duenh seizgan cinghseuq youh mizyinx ndeu，hix dwg duenh seizgan hawj vunz louzlienh caeuq nanzlumz ndeu. Youq seiz lij iq, dou moix ngoenz cungj bien gij gojgaeq mwhnyez fungfouq haenx.

Geiq ndaej miz baez hanzgyaj ndeu cingq bungz daengz ngoenzseng gou, daxboh soengq gyaq danci hoengzmaeq ndeu hawj gou, gou geijlai gyaez gyaq danci neix ha! Moix ngoenz gou cungj aeu gwih de bae guhcaemz, daengz banringz ma daengz ndawranz, gou cungj aeu dawz gyaq danci gou ceiq gyaez neix swiq baez dem baez, gizgiz cungj swiq ndaej seuqsatsat, seuq dwk yawj hwnjbae couh lumj ngamq cawx ma ityiengh, lienz gij dapbanj caij din haenx cungj uet ndaej seuqsatsat. Dahnuengx gou siengj gwih, gou hix mbouj hawj, gou lau de dawz danci gou dwkvaih bae. Dahnuengx couh baema ranz lwnh daxmeh nyi, daxmeh gangj naeuz:“Mwngz hawj dahnuengx gwih yaep ndeu cungj mbouj ndaej, mwngz caen dwg boux siujheiq.” Hoeng gou lij dwg mbouj hawj dahnuengx gwih danci gou, daxmeh cungj naeuz gou gig siujheiq .

Geiq ndaej lij miz baez ndeu, gou caeuq dahnuengx ndawranz bae guh- caemz, yawjraen go lwgfiengz ndeu, gwnz gofiengz venj miz haujlai lwgfiengz youh hung youh henj, yawj dwk dou myaiz itcig rih, cungj siengj hwnjbae haeb gaemz ndeu. Doeklaeng gou caeuq dahnuengx couh hwnjbae caeg mbaet geij aen lwgfiengz, hoeng lij dwg deng bouxcawj raen lo, de ndatheiq dwk gyaep gvaqdaeuj, itmienh gyaep itmienh swenj:“Sou dwg lwgnyez ranz lawz, gamj daeuj caeg gij mak ranz gou?” Haih ndaej dou heux aen mbanj buet le geij gien. Doeklaeng boux- cawj haenx ra mbouj raen dou, couh deuz lo. Dou song boux couh baema ranz swiq lwgfiengz, gwn dwk diemzsubsub.

Neix couhdwg gij saehyinx mwhnyez gou, seizneix siengj daengz seizhaenx caeg lwgfiengz vunz gwn, caen dwg mbouj miznaj, baezlaeng gou caiq mbouj guh gijsaeh neix lo.

(Sanglinz Yen Dafungh Cin Vangzcouh Siujyoz haj nienzgaep Cinz Swjyi boux lauxsae son’gyauq Vangz Gveiyangh)